21 қаңтарда Алматыда Орталық Азиядағы БҰҰ Жаһандық шарты Сетінің Директорлар кеңесінің алғашқы отырысы өтті. Жиын Директорлар кеңесінің төрайымы, бұл қызметке өткен жылдың тамыз айында сайланған Үміт Шаяхметованың төрағалығымен ұйымдастырылды, деп хабарлайды DKNews.kz.
Аталған отырыс аймақта жауапты бизнес қағидаттарын ілгерілету мен орнықты даму мақсаттарын жүзеге асыруға бағытталған жаңа кезеңнің басталғанын көрсетті.
Аймақтық диалог алаңы
Орталық Азиядағы БҰҰ Жаһандық шарты Сеті Қазақстан, Өзбекстан, Қырғызстан, Тәжікстан және Түрікменстан елдеріндегі бизнес өкілдерін біріктіреді. Бұл платформа жауапты кәсіпкерлік қағидаттарын, ESG және орнықты даму мақсаттарын ілгерілету бағытында бизнес, сарапшылар қауымдастығы және халықаралық серіктестер арасындағы диалог алаңы ретінде жұмыс істейді.
Соңғы жылдары Сетінің рөлі тек бизнес үшін ғана емес, ұзақмерзімді даму стратегиясын көздейтін мемлекеттік институттар үшін де арта түсті.
Қатысушылар саны төрт есеге жуық өсті
Отырыс барысында Сетінің соңғы үш жылдағы жұмысының қорытындылары таныстырылды. 2023–2025 жылдар аралығында Орталық Азиядағы БҰҰ Жаһандық шарты Сетіне қатысушы ұйымдар саны 36-дан 146-ға дейін артқан.
Бұл көрсеткіш аймақтағы компаниялардың ESG және орнықты даму қағидаттарын бизнес стратегиясының ажырамас бөлігі ретінде қабылдай бастағанын аңғартады.
2026–2030 жылдарға арналған стратегия
Күн тәртібіндегі негізгі мәселе Сетінің 2026–2030 жылдарға арналған даму стратегиясын талқылау болды. Ұсынылған құжат аймақтағы ынтымақтастықты жаңа деңгейге көтеруді көздейді.
Басым бағыттардың қатарында:
- бизнес, сарапшылар қауымдастығы және халықаралық серіктестер арасындағы әріптестік форматтарды дамыту;
- бірлескен өңірлік бастамаларды іске асыру;
- орнықты дамудың үздік тәжірибелерін тарату;
- талдамалық және зерттеу құралдарын пайдалану арқылы компаниялардың бәсекеге қабілеттілігін арттыру көзделген.
Аймақтық бірігу және бизнестің рөлі
Директорлар кеңесінің төрайымы Үміт Шаяхметованың айтуынша, Сетінің басты миссиясы – Орталық Азия елдерінің күш-жігерін орнықты даму қағидаттары төңірегінде біріктіру.
Ол өңірде аймақтық консолидация үрдісі күшейіп келе жатқанын атап өтті. Бұл үрдіс БҰҰ-ның жаһандық күн тәртібі аясында Орталық Азия елдері үкіметтері мен мемлекет басшылары деңгейінде қолдау табуда.
Шаяхметованың пікірінше, БҰҰ Жаһандық шартының қызметі аймақтың дамуына жүйелі әрі ұзақмерзімді әсер ете алады. Алайда табыстың негізгі шарты – бизнестің, жеке сектордың және қауымдастықтардың ESG және SDG күн тәртібіне белсенді түрде тартылуы және оның корпоративтік басқару мен адами капиталды басқару тәжірибесіне енгізілуі.
Жаһандық сын-қатерлерге жауап
Орталық Азиядағы БҰҰ Жаһандық шарты Сетінің атқарушы директоры Динара Сейджапарова қазіргі әлемдегі негізгі сын-қатерлердің өзара тығыз байланысты екенін атап өтті.
Оның айтуынша, климаттың өзгеруі, гендерлік теңсіздік және геосаяси тұрақсыздық жағдайында БҰҰ Жаһандық шарты БҰҰ мен жеке сектор арасындағы тұрақты диалогты қамтамасыз ететін бірегей халықаралық платформа болып қала береді.
Сетінің негізгі міндеті – Орталық Азия бизнесін біріктіру және халықаралық стандарттарды енгізу арқылы өңірдің орнықты дамуына ықпал ету.
Алдағы жоспарлар
Отырыс қорытындысы бойынша қатысушылар талқыланған күн тәртібінің өзектілігін атап өтіп, алдағы жылдарға арналған Директорлар кеңесі мен Сетінің басым жұмыс бағыттарын келісіп алды.
Орталық Азиядағы БҰҰ Жаһандық шарты Сетінің Директорлар кеңесінің келесі отырысы 2026 жылдың қазан айында Ташкент қаласында өтеді.
Сарапшылардың пікірінше, Сетінің одан әрі дамуы Орталық Азияда орнықты, бәсекеге қабілетті және өзара тығыз ықпалдасқан экономикалық кеңістік қалыптастыруға ықпал етуі мүмкін.
