Қазақстан мен Германия арасындағы серіктестік жаңа деңгейге көтерілуі мүмкін. ҚР Премьер-министрінің орынбасары – ұлттық экономика министрі Серік Жұманғарин Германия Сыртқы істер министрлігінің Саяси директоры Доминик Муттермен кездесіп, екі ел арасындағы сауда-инвестициялық ынтымақтастықтың болашағын талқылады, деп хабарлайды DKNews.kz.
Келіссөз барысында Қазақстан Германияны Еуропалық одақтағы негізгі стратегиялық әріптестерінің бірі ретінде қарастыратыны атап өтілді. Тараптар үшін экономикалық байланыстар, әсіресе сауда мен инвестиция, екіжақты қатынастардың басты тірегі болып қала береді.
Сауда өсіп жатыр, бірақ мақсат – әртараптандыру
Серік Жұманғарин Қазақстан үшін Германиямен сауда-инвестициялық өзара іс-қимылды дамыту стратегиялық басымдық екенін атап өтті.
Оның айтуынша, алдағы кезеңде басты назар сауданы әртараптандыруға және экономиканың негізгі салаларына жаңа технологияларды енгізуге аударылады. Бұл ынтымақтастықты жүйелі әрі ұзақмерзімді форматта дамытуға мүмкіндік береді.
Германия қазіргі таңда Қазақстанның сауда әріптестері арасында жетінші орында тұр. 2025 жылғы қаңтар-қараша айларының қорытындысы бойынша екі ел арасындағы тауар айналымы 3,9 млрд АҚШ долларын құрады. Оның ішінде экспорт көлемі 1,2 млрд долларды құрап, 7,9 пайызға өсті, ал импорт 2,7 млрд доллар болып, 6,1 пайызға артқан.
Инвестиция: 36 жоба және 49,7 млрд еуро
Кездесуде екі ел арасында тұрақты экономикалық диалог қалыптасқаны атап өтілді. Бұл диалогта Үкіметаралық комиссия мен Іскерлік кеңес маңызды рөл атқарады.
Нәтиже де бар. Қазіргі таңда Германия компанияларының қатысуымен Қазақстанда жалпы құны 49,7 млрд еуроны құрайтын 36 инвестициялық жоба іске асырылып жатыр. Оның 23-і пайдалануға берілген. Жиналған тәжірибе енді ынтымақтастықтың неғұрлым технологиялық күрделі форматына көшуге мүмкіндік беріп отыр.
«Жасыл» энергетика, сутегі және болат
Келіссөздердің маңызды бөлігі стратегиялық жобаларды бірлесіп қаржыландыруға арналды. Әсіресе өнеркәсіптік кәсіпорындарды жаңғырту, неміс банктері мен сақтандыру құралдарының қатысуымен «жасыл» энергетиканы дамыту мәселелері көтерілді.
Қазақстан тарапы қазақстандық-германдық бірлескен қаржыландыру тетігін белсенді пайдалануды ұсынды. Сонымен қатар Германияның қаржы институттары мен компанияларының қатысуымен сутегі энергетикасы мен «жасыл» энергетика саласындағы жобаларды іске асыруға дайын екенін растады. Болашақта «жасыл» болат бағыты бойынша да ынтымақтастықты дамыту көзделіп отыр.
Ауыл шаруашылығы – тұрақты серіктестік бағыты
Германия Қазақстан үшін агроөнеркәсіптік кешендегі маңызды әріптес болып қала береді. Бұған дейін тараптар Орталық Азиядағы Орнықты егіншілік өңірлік орталығын құру тұжырымдамасын келіскен болатын.
Қазір бұл бағытта практикалық жұмыс басталып, орталықты құру және одан әрі ынтымақтастықтың стратегиялық бағытын айқындайтын Үйлестіру кеңесін қалыптастыру қолға алынған.
Германия Қазақстанның рөлін жоғары бағалайды
Өз кезегінде Доминик Муттер Германия үшін Қазақстанмен ынтымақтастықтың маңызын атап өтті.
Оның айтуынша, Германия Орталық Азия елдерімен, әсіресе Қазақстанмен стратегиялық аймақтық әріптестікті жоғары бағалайды. Сондай-ақ Қазақстанның аймақтағы рөлі мен көпвекторлы саясатына оң баға берілді.
Доминик Муттер жаһандық өзгерістер жағдайында екі ел үшін де ынтымақтастықтың жаңа мүмкіндіктерін анықтау маңызды екенін атап өтті.
Алдағы бағыт айқын
Кездесу қорытындысы бойынша тараптар екіжақты ынтымақтастықты одан әрі кеңейтуге және оның әлеуетін арттыруға мүдделі екенін растады. Технология, «жасыл» экономика, инвестиция және агросектор – Қазақстан мен Германия серіктестігінің негізгі бағыттарына айналмақ.
