Қазақстандықтар үшін Қытайға жол тағы бір қадамға жақындай түсті. Air Astana әуе компаниясы Алматы - Шанхай - Алматы жаңа тұрақты бағыты бойынша билеттердің сатылымы басталғанын хабарлады. Алғашқы рейстер 2026 жылғы 29 наурыздан бастап орындалуы жоспарланып отыр - мемлекеттік органдардан тиісті рұқсаттар алынған жағдайда, деп хабарлайды DKNews.kz.
Жаңа бағыт іскерлік сапарлар мен туризмге ғана емес, жалпы Қазақстан мен Қытай арасындағы байланыстарды нығайтуға бағытталған маңызды қадам болмақ. Шанхай - Азиядағы ең ірі мегаполистердің бірі, әлемдік қаржы мен сауданың басты орталықтарының қатарында.
Ұшу кестесі ыңғайлы, әуе кемесі заманауи
Алматыдан Шанхайға рейстер аптасына үш рет - сейсенбі, бейсенбі және жексенбі күндері орындалады. Ұшып кету уақыты сағат 19:10, ал Шанхайға келу келесі күні сағат 04:25-ке жоспарланған.
Қайтар рейстер дүйсенбі, сәрсенбі және жұма күндері жүзеге асады. Шанхайдан ұшу уақыты сағат 05:40, Алматыға келу сағат 10:15.
Барлық рейстер заманауи әрі жайлы Airbus A321LR әуе кемесімен орындалады. Ұшу уақыты Шанхай бағыты бойынша 6 сағат 15 минутты, кері бағытта 7 сағат 35 минутты құрайды. Бұл ұшақтар ұзақ қашықтыққа бейімделген және жолаушылар үшін жоғары деңгейдегі жайлылықты қамтамасыз етеді.
Билеттердің бағасы қанша
Алматыдан Шанхайға барып-қайту билеттерінің ең төменгі құны, барлық алымдарды қосқанда, эконом-класта 281 312 теңгеден басталады. Бизнес-кластағы билеттердің бағасы 921 132 теңгеден жоғары.
Билеттерді Air Astana-ның ресми сайтынан, мобильді қосымшасынан, сондай-ақ аккредиттелген туристік агенттіктерден сатып алуға болады.
Air Astana-ның Қытайдағы бағыттары көбейіп келеді
Шанхайға жаңа рейстің ашылуы Air Astana-ның Қытайдағы қатысу аясын одан әрі кеңейтеді. Қазіргі таңда әуе компаниясы Бейжің, Гуанчжоу, Үрімші және Санья бағыттары бойынша тұрақты рейстер орындайды. Енді бұл тізімге Қытайдың қаржы және іскерлік астанасы саналатын Шанхай қосылып отыр.
Бұл бағыт Қазақстан мен Қытай арасындағы іскерлік байланыстарға, туризмге, білім беру сапарларына және жеке саяхаттарға қосымша серпін бермек. Оның үстіне, қазақстандықтар үшін Қытайға визасыз кіру мүмкіндігі бұл бағыттың тартымдылығын арттыра түседі.
Шанхай неге қызық
Шанхай - заманауи мегаполис пен бай тарихтың тоғысқан нүктесі. Қалада аспанмен таласқан зәулім ғимараттар көне кварталдармен, дәстүрлі қытай мәдениеті мегаполистің қарқынды өмір салтымен үйлесім тапқан.
Туристер үшін Шанхайдың басты көрікті жерлерінің қатарында Пудун іскерлік ауданына панорамалық көрініс ашылатын Вайтань жағалауы, «Шығыс маржаны» телемұнарасы, Юйюань бағы, сондай-ақ храмдар, музейлер, театрлар мен ірі сауда көшелері бар. Қала гастрономиясымен де танымал, бұл оны тек іскер адамдар үшін ғана емес, демалыс пен әсер іздеген саяхатшылар үшін де тартымды етеді.
Алматы - Шанхай тікелей рейсінің іске қосылуы Қытайды қазақстандықтар үшін бұрынғыдан да қолжетімді ете түседі. Сарапшылардың пікірінше, бұл бағыт Air Astana-ның ең сұранысқа ие халықаралық маршруттарының біріне айналуы әбден мүмкін.
