Қытай Орталық Азия елдерімен туристік байланыстарын жүйелі түрде кеңейтіп келеді, ал бұл үдерісте Қазақстанға ерекше мән беріліп отыр. Осы аптада Қытайдың оңтүстік-батысында орналасқан Гуйчжоу провинциясының әкімшілік орталығы Гуйян қаласында қазақстандық туроператорлар делегациясы мен қытайлық әріптестердің қатысуымен кездесу-семинар өтті. Іс-шараға екі елдің мәдениет және туризм, сыртқы байланыстар, спорт және азаматтық авиация салаларының өкілдері қатысты, деп хабарлайды DKNews.kz.
Сырттай қарағанда бұл - салалық деңгейдегі кезекті жұмыс кездесуі. Алайда оның астарында Қытайдың Қазақстанмен және жалпы Орталық Азиямен жаңа туристік бағыттар арқылы байланыс орнатуға деген ұмтылысы жатыр. Мұнда әңгіме ірі мегаполистер туралы емес, өзіндік мәдени болмысы мен табиғи ерекшелігі бар өңірлер жайында болып отыр.
Қазақстан - маңызды әріптес
Қытай тарапы Қазақстанды жай ғана көрші ел емес, Ұлы Жібек жолындағы маңызды түйін және келешегі зор туристік нарық ретінде қарастырады. Табиғи ресурстардың байлығы, қазақстандықтардың шетелге саяхаттауға деген қызығушылығының артуы және географиялық жақындық Гуйчжоу провинциясы үшін Қазақстанды Орталық Азиядан турист тартудағы негізгі әріптеске айналдырып отыр.
2023 жылы Қазақстан мен Қытай арасында өзара визасыз режим енгізілгеннен кейін гуманитарлық және туристік алмасулар айтарлықтай жанданды. Соның нәтижесінде осындай форматтағы кездесулер екіжақты ынтымақтастықты тереңдетудің маңызды құралына айналды.
Гуйчжоудың туристік ерекшелігі қандай
Кездесу барысында қытайлық тарап қазақстандық туроператорларға Гуйчжоу провинциясының туристік бағыттарын, этномәдени бағдарламаларын және арнайы турөнімдерін таныстырды. Негізгі назар таулы туризмге, табиғи ландшафтарға, мяо мен дун халықтарының дәстүрлі мәдениетіне, сондай-ақ жаппай туризмнен гөрі әсер мен тәжірибеге негізделген саяхат форматтарына аударылды.
Гуйчжоу - аспанмен таласқан зәулім ғимараттар мен сауда орталықтары емес. Бұл - сарқырамалар, карст таулары, күріш террасалары және ғасырлар бойы сақталған ауылдық өмір салты бар өңір. Қытай дәл осы «басқа қырын» Қазақстаннан келетін туристерге көрсетуді көздеп отыр.
Келіссөз ғана емес, жеке әсер
Маңыздысы - кездесу тек ресми презентациялармен шектелген жоқ. Семинарға дейін қазақстандық туроператорлар Гуйян, Аньшунь, Цяньдуннань-Мяо-Дун автономиялық округі және провинцияның өзге де аймақтарындағы туристік нысандарды аралады.
Бұл сапар оларға өңірдің таулы табиғатын, туристік инфрақұрылымын және қызмет көрсету деңгейін көзбен көріп, тікелей бағалауға мүмкіндік берді. Туризм саласында мұндай тәжірибе ерекше маңызды, себебі бағыттың әлеуеті жарнамалық материалдар арқылы емес, нақты әсер арқылы айқындалады.
Ұзақмерзімді әріптестікке ставка
Кездесу қорытындысы бойынша тараптар өзара тиімді және тұрақты ынтымақтастық тетігін қалыптастыруға дайын екендерін білдірді. Бұл тек Қазақстаннан және Орталық Азияның басқа елдерінен Гуйчжоуға келетін туристер санын арттыруды ғана емес, мәдениет пен туризм ресурстарын бірлесе пайдалануды, тәжірибе алмасуды және бір-бірінің нарықтарын кеңейтуді көздейді.
Қазақстан үшін бұл Қытайдағы әлі де жаппай танымал бола қоймаған, бірақ болашағы зор жаңа бағыттардың ашылуын білдіреді. Ал Гуйчжоу үшін - туристік нарығы енді ғана қалыптасып келе жатқан Қазақстанмен тығыз байланыс орнату мүмкіндігі.
Неліктен бұл маңызды
Бүгінде туризм тек экономиканың бір саласы ғана емес, гуманитарлық дипломатияның маңызды құралына айналып отыр. Осындай сапарлар арқылы елдер арасында өзара сенім қалыптасып, мәдениеттерді тереңірек түсіну мүмкіндігі туады.
Бұл тұрғыда Гуйчжоу санға емес, сапаға мән беруді таңдаған. Ал Қазақстандық туроператорлардың қызығушылығы Қытайды туристер үшін жаңа қырынан - таулар, дәстүрлер мен тірі мәдениет арқылы танытуға дайын екенін көрсетеді.
