Биыл мамыр айында Астана халықаралық қаржы және экспорт саласының назарын өзіне аударады. 11–14 мамыр аралығында елордада Берн Одағының кезекті көктемгі отырысы өтеді. Бұл – экспорттық кредиттеу мен инвестицияларды сақтандыру саласындағы ең беделді халықаралық алаңдардың бірі. Маңыздысы – бұл жиын ТМД кеңістігінде алғаш рет Қазақстанда ұйымдастырылады, деп хабарлайды DKNews.kz.
70-тен астам ел, 200-ден аса жетекші сарапшы
Астанада өтетін отырысқа әлемнің 70-тен астам елінен 200-ден аса қаржы саласының жетекші мамандары жиналады. Экспорттық-кредиттік агенттіктердің, эксимбанктердің, халықаралық қаржы институттарының және ірі жеке сақтандыру компанияларының өкілдері Қазақстанға арнайы келеді.
Бұл – жаһандық экспортты қаржыландыру жүйесінде шешім қабылдайтын негізгі ойыншылардың басын қосатын алаң болмақ.
«Қиылыс» – жаһандық өзгерістердің символы
Алдағы жиынның басты тақырыбы – «Қиылыс». Бұл ұғым экспорттық кредиттеу жүйесінің бүгінгі жаһандық сын-қатерлері мен түбегейлі трансформациясын бейнелейді.
Күн тәртібінде:
- экспорттық қаржыландырудағы цифрландыру және жасанды интеллектіні қолдану
- геосаяси және салалық өзгерістер жағдайында жаңа индустриялық шешімдер
- тәуекелдерді бағалау мен сақтандыру өнімдерін басқарудағы инновациялар
- экспортты ынталандыру үшін қолайлы орта қалыптастыру
Іскерлік бағдарлама аясында Берн Одағының пленарлық отырыстары, экспорттық-кредиттік агенттіктер комитетінің жұмыс сессиялары және Прага клубының отырысы жоспарланған.
Aman Union және ислам елдерімен сауда
Маңызды іс-шара аясында Aman Union ұйымының атқарушы комитетінің отырысы да өтеді. Бұл бірлестік коммерциялық және саяси тәуекелдерді сақтандыру арқылы ислам елдері мен олардың серіктестері арасындағы сауда мен инвестицияны қолдауға бағытталған.
Аталған жиынға бірқатар елдердің экспорттық институттарының топ-менеджерлері қатысады деп күтілуде. Ал қазақстандық даму институттары бұл кездесуге бақылаушы ретінде қосылып, жаһандық экспорттық саясатты қалыптастыру процесіне тікелей араласуға мүмкіндік алады.
Қазақстан үшін стратегиялық мүмкіндік
Берн Одағы аясындағы мұндай халықаралық алаңдарға қатысу Қазақстан үшін айрықша маңызға ие. Бұл:
- халықаралық инвесторлардың сенімін арттырады
- отандық компаниялардың шетелдік серіктестер арасындағы танымалдылығын күшейтеді
- елдің инвестициялық тартымдылығын жоғарылатады
- экспортқа несие тарту мен сақтандыру саласында озық әлемдік тәжірибені енгізуге жол ашады
Яғни, Қазақстан тек қатысушы ғана емес, жаһандық шешімдер талқыланатын орталықтардың біріне айналып келеді.
«Бұл – жай отырыс емес, халықаралық диалог алаңы»
Іс-шараны ұйымдастыратын Қазақстанның экспорттық-кредиттік агенттігінің басшысы Аллен Шәйжүнісов Берн Одағының отырысын елордада өткізудің маңызын атап өтті.
Оның айтуынша, бұл жиын күнтізбедегі кезекті шара ғана емес, ынтымақтастықты нығайтуға, инновацияларды ілгерілетуге және тұрақты даму мәселелерін талқылауға арналған маңызды халықаралық платформа.
Бұл диалогтарға белсенді қатысу Қазақстанды халықаралық сауда жүйесінде сенімді, ашық әрі болжамды әріптес ретінде танытуға мүмкіндік береді.
Берн Одағының салмағы қандай
Берн Одағы экспорттық кредиттеу мен инвестицияларды сақтандыру саласындағы жаһандық қағидалар мен стандарттарды қалыптастыратын негізгі ұйымдардың бірі саналады. Бүгінде оның мүшелері жыл сайын шамамен 2,5 триллион АҚШ доллары көлемінде төлем тәуекелдерінен сақтандыру қорғанысын ұсынады.
Бұл көрсеткіш әлемдік трансшекаралық сауданың 13 пайызына жуығын қамтиды.
Қазақстан – жаһандық экспорт картасында
Берн Одағының көктемгі отырысының Астанада өтуі Қазақстанның халықаралық қаржы және экспорттық саясаттағы рөлінің күшейіп келе жатқанын көрсетеді. Бұл – ел үшін тек имидждік жетістік емес, нақты экономикалық мүмкіндіктерге жол ашатын маңызды кезең.
Мамырдағы бұл жиын Астананы жаһандық экспорттық қаржыландырудың маңызды тораптарының біріне айналдырып, Қазақстанның халықаралық экономикалық жүйедегі орнын одан әрі нығайта түспек.
