2026 жылғы 6-22 ақпан аралығында Италияда XXV қысқы Олимпиада ойындары өтеді. Төртжылдықтың басты спорт додасын Милан мен Кортина-д’Ампеццо қабылдайды. Бұл шешім 2019 жылғы 24 маусымда Лозаннада өткен Халықаралық Олимпиада комитетінің 134-сессиясында қабылданған.
Италия үшін алдағы Олимпиада тарихтағы төртіншісі болса, Милан қысқы Олимпиаданы алғаш рет өткізеді. Ал Кортина-д’Ампеццо бұған дейін де Олимпиада алауын жаққан қала - дәл осы жерде 1956 жылы VII қысқы Олимпиада ойындары өткен, деп хабарлайды DKNews.kz.
Қазақстан құрамасындағы гвардияшылар
2026 жылғы Олимпиадада Қазақстан атынан елдің ұлттық құрамасы сапында ҚР ІІМ Ұлттық ұланының әскери қызметшілері де өнер көрсетеді. Олар әскери қызмет пен жоғары деңгейдегі спортты қатар алып жүрген кәсіби атлеттер.
Ұлттық ұлан сапындағы спортшылар үшін Олимпиада - тек жарыс емес. Бұл тәртіп, төзім мен жауапкершіліктің сыналар сәті.
Юлия Галышева: тәжірибе мен тарих
Фристайл-могулдағы ұлттық құраманың көшбасшыларының бірі - Ұлттық ұланның спорт командасын даярлау орталығының аға нұсқаушысы, аға лейтенант Юлия Галышева.
2017 жылы ол Алматыда өткен Қысқы Универсиадада жеңіске жетіп, Саппородағы Қысқы Азия ойындарында алтын және күміс медаль иеленді. Сол жылы Әлем кубогы кезеңдерінде де табысты өнер көрсетіп, Қытайдағы жарыстарда алтын мен күміске қол жеткізді.
Юлия Галышеваның мансабындағы ең маңызды белестердің бірі - 2018 жылғы Пхенчхандағы Олимпиада. Ол могул дисциплинасында қола жүлде алып, Қазақстан фристайлы тарихындағы алғашқы олимпиадалық медальді сыйлады. Ал 2019 жылы Парк-Ситиде әлем чемпионы атанып, өз деңгейін тағы бір мәрте дәлелдеді.
Абзал Әжғалиев: мұздағы сенімділік
Шорт-трек сайыстарында Қазақстанды Ұлттық ұланның спорт командасын даярлау орталығының аға нұсқаушысы, ефрейтор Абзал Әжғалиев таныстырады.
2025 жылы ол 5000 метрлік командалық эстафетада Азия ойындарының чемпионы атанып, аралас эстафетада күміс жүлдеге ие болды. Бұған дейін Монреаль мен Солт-Лейк-Ситиде өткен Әлем кубогы кезеңдерінде күміс медальдар жеңіп алып, халықаралық ареналарда тұрақты нәтиже көрсетті.
Жаңа буын - болашақтың үміті
Ұлттық ұлан сапында Олимпиадаға дайындалып жатқан жас спортшылар да бар. Солардың бірі - 5571 әскери бөлімінің сарбазы, қатардағы жауынгер Илья Мизерных. Ол - Қазақстан тарихындағы қысқы жасөспірімдер Олимпиадасының алғашқы чемпионы. Милан Олимпиадасында ол ересектер арасындағы ұлттық құраманың негізгі мүшелерінің бірі ретінде өнер көрсетеді.
Тағы бір үміт күттіретін спортшы - Ұлттық ұланның спорт командасын даярлау орталығының аға маманы, дене шынықтыру және спорт жөніндегі аға нұсқаушы, қатардағы жауынгер Данил Васильев. Соңғы маусымдарда ол елдегі ең перспективалы шаңғы трамплинінен секірушілердің бірі ретінде танылды.
2024-2025 жылдары Данил Васильев FIS кезеңінде жеңіске жеткен алғашқы қазақстандық атанып, жазғы Гран-при мен FIS Cup жарыстарында жүлде алды. Төрт трамплин турниріндегі табысты өнері мен тұрақты нәтижелері оған Милан мен Кортина-д’Ампеццодағы Олимпиадаға жолдама әкелді.
Қызмет пен спорттың бірлігі
Ұлттық ұлан әскери қызметшілерінің XXV қысқы Олимпиада ойындарына қатысуы - әскери тәртіп пен кәсіби спорттың бірін-бірі толықтыра алатынын көрсететін жарқын мысал.
Бұл спортшылар халықаралық ареналарда Қазақстанның намысын қорғап қана қоймай, жас буынға төзімділік, еңбекқорлық пен патриотизмнің нақты үлгісін көрсетіп келеді. Милан Олимпиадасы олар үшін тағы бір үлкен сын әрі ел спорты тарихындағы жаңа бет болмақ.
