Әл-Фараби атындағы Қазақ ұлттық университеті халықаралық әріптестікті кеңейту жолында тағы бір маңызды қадам жасады. Университетке арнайы жұмыс сапарымен Шанхай университетінің делегациясы келіп, екіжақты ынтымақтастықтың жаңа бағыттары талқыланды, деп хабарлайды DKNews.kz.
Шанхай университетінің Халықаралық қатынастар департаментінің директоры Цуй Вэй мен MBA Center және менеджмент мектебінің деканы Чжэнь Лу бастаған қонақтарды ҚазҰУ-дың Басқарма мүшесі – академиялық мәселелер жөніндегі проректор Алина Галеева қабылдады. Кездесу барысында тараптар білім беру және ғылым саласындағы серіктестікті тереңдету мүмкіндіктеріне жан-жақты тоқталды.
Қосдиплом және академиялық ұтқырлық – басты бағыт
Келіссөздердің негізгі өзегі ортақ білім беру бағдарламаларын әзірлеу, қосдипломдық оқыту жүйесін енгізу және студенттер мен оқытушылардың академиялық ұтқырлығын арттыру болды. Бұл бастамалар екі университеттің білім беру әлеуетін біріктіріп, жастарға халықаралық деңгейде білім алу мүмкіндігін кеңейтуді көздейді.
Проректор Алина Галеева ҚазҰУ-дың Қытайдың жетекші жоғары оқу орындарымен қалыптасқан ынтымақтастығы туралы айтып, бірлескен ғылыми жобалардың нақты нәтижелерін атап өтті. Оның айтуынша, екі университеттің де кадрлық, ғылыми және академиялық ресурстары серіктестікті жаңа сапалық деңгейге шығаруға толық жеткілікті.
Ынтымақтастыққа дайындық бар
Өз кезегінде Шанхай университетінің Халықаралық қатынастар департаментінің директоры Цуй Вэй ҚазҰУ-мен байланыстарды нығайтуға бағытталған барлық бастамаларды қолдайтынын білдірді. Ол бірлескен бағдарламалар мен жобалар екі елдің білім кеңістігін жақындастырып қана қоймай, болашақта ғылым мен бизнеске де серпін беретінін атап өтті.
Кездесу қорытындысы бойынша тараптар алдағы уақытта жаңа келісімдерге қол қоюға уағдаласты. Бұл құжаттар ҚазҰУ мен Шанхай университеті арасындағы әріптестікті институционалдық тұрғыда бекітіп, студенттер мен жас ғалымдар үшін жаңа мүмкіндіктер ашпақ.
Халықаралық серіктестікті жүйелі түрде дамыту ҚазҰУ-дың жаһандық білім кеңістігіндегі орнын күшейтіп, университетті халықаралық деңгейде бәсекеге қабілетті академиялық орталық ретінде одан әрі нығайта түседі.
