Қазақстан автонарығы тағы бір маңызды кезеңге аяқ басты. Astana Motors Корея мен АҚШ-тағы серіктестерімен бірге елімізде алюминий дөңгелек дискілерін өндіруді локализациялауды көздеп отыр. Бұл жоба тек жаңа зауыт салумен шектелмей, автокөлік өнеркәсібіндегі импортқа тәуелділікті азайтуға және Қазақстанды автокомпоненттер өндіретін өңірлік ойыншыға айналдыруға бағытталған, деп хабарлайды DKNews.kz.
4 ақпанда Астанада Astana Motors, америкалық Open Element және кореялық Hands Corporation арасында бірлескен кәсіпорын құру туралы үшжақты меморандумға қол қойылды. Құжатқа қол қою рәсімі ҚР Үкімет үйінде өтіп, оған Премьер-Министрдің бірінші орынбасары Роман Скляр, Сыртқы істер министрінің орынбасары Әлібек Қуантыров және Astana Motors компаниясының негізін қалаушы Нұрлан Смағұлов қатысты. Меморандумға Astana Motors бас директоры Бекнұр Несіпбаев, Hands Corporation төрағасы Сын Хён Чан және Open Element негізін қалаушы әрі бас директоры Мустафа Аккари қол қойды.
Gov
Қарапайым жинақ емес, толық технологиялық цикл
Жоба аясында Қазақстанда алюминий дөңгелек дискілерін өндіретін заманауи зауыт салу жоспарланған. Бұл – елімізде алғаш рет толық технологиялық циклді қамтитын, соның ішінде озық инженерлік және өндірістік шешімдер трансфері жүзеге асатын өндіріс болмақ.
Мұндай формат автокөлік өнеркәсібіндегі локализацияның жаңа деңгейіне шығуға мүмкіндік береді. Бірлескен кәсіпорын тек дайын өнім шығарумен шектелмей, автокомпоненттер экожүйесін қалыптастыруға және байланысты салалардың дамуына серпін береді.
Қазақстан неге таңдалды
Шетелдік серіктестердің айтуынша, инвестиция үшін Қазақстанды таңдау – бірнеше экономикалық және стратегиялық факторлардың тоғысуы. Елде автокөлік өндірісі тұрақты өсіп келеді, бірақ сонымен қатар автокомпоненттер импортына тәуелділік жоғары. Бұл локализацияға нақты сұраныс бар екенін көрсетеді.
Қосымша артықшылық – Қазақстандағы шикізат базасы мен дамыған алюминий секторы. Бұл алюминий дөңгелек дискілерін жергілікті жерде өндіруді экономикалық тұрғыдан тиімді әрі бәсекеге қабілетті етеді.
Gov
Корея тәжірибесі және жаһандық нарық
Hands Corporation – алюминий дөңгелек дискілерін өндіру саласындағы әлемдік көшбасшылардың бірі. 1972 жылы құрылған компания бүгінде әлемдегі алты ірі өндірушінің қатарына кіреді және Оңтүстік Корея нарығының 60 пайыздан астамын қамтып отыр. Компанияның өндірістік алаңдары Корея Республикасында, Қытайда және Мароккода орналасқан, ал клиенттері қатарында әлемдік автоконцерндер бар.
«Бізде сенімді технологиялар, өндірістік ауқым және жаһандық автокөлік өндірушілерімен жұмыс істеу тәжірибесі бар. Қазақстан біздің өндірістегі қатысуымызды кеңейту жолындағы келесі қисынды қадам болды», – деді Hands Corporation төрағасы Сын Хён Чан.
Америкалық серіктестің көзқарасы
Open Element компаниясы автокомпоненттер өндірісін локализациялау және масштабтау бағытында жұмыс істейді. Компания үшін Қазақстан – ұзақмерзімді индустриялық әлеуеті бар нарық.
«Open Element компаниясында біз технология, адами капитал және ұзақ мерзімді сұраныс тоғысатын интеллектуалды өндірістік жеткізу тізбектерін құрамыз. Қазақстан дәл осындай мүмкіндік ұсынып отыр. Astana Motors-пен серіктестік бұл жобаның тұрақты, жаһандық деңгейде бәсекеге қабілетті болуына негіз қалайды», – деді компанияның негізін қалаушы әрі бас директоры Мустафа Аккари.
Astana Motors
Алдымен ішкі нарық, кейін экспорт
Жаңа зауыттың өнімдері бастапқы кезеңде Astana Motors құрамындағы автокөлік зауыттарының қажеттілігін қамтамасыз етуге бағытталады. Кейін жобаның географиясы кеңейіп, ЕАЭО мен ТМД елдеріндегі басқа да автокөлік өндірушілеріне жеткізілімдер жоспарланып отыр.
«Бірінші кезеңде зауыт өнімдері Astana Motors автокөлік зауыттарының қажеттіліктерін қамтамасыз етеді. Алдағы уақытта біз басқа да автоөнеркәсіп қатысушыларымен жұмыс істеп, экспорттық бағытты кеңейтуді көздеп отырмыз», – деді Astana Motors бас директоры Бекнұр Несіпбаев.
Автокомпоненттер хабына қарай қадам
Алюминий дөңгелек дискілерін өндіру жобасы Қазақстанның ұзақмерзімді индустриялық стратегиясының бір бөлігі саналады. Бұл стратегия елімізді тек автокөліктерді құрастыратын емес, өңірлік нарықтарға өнім жеткізетін ірі автокомпоненттер өндірушісіне айналдыруды көздейді.
Сарапшылардың пікірінше, дәл осындай жобалар Қазақстан автонарығын жаңа деңгейге шығарып, елдің жаһандық өндірістік тізбектердегі орнын нығайтады.
