Қазақстанның арнайы мақсаттағы бөлімшелері халықаралық аренада тағы бір мәрте өз мықтылығын дәлелдеді. Дубайда (БАӘ) өтіп жатқан UAE SWAT Challenge турнирінің алғашқы күні еліміз үшін нағыз сенсациямен аяқталды. 48 мемлекеттің 109 арнайы жасақ командасы қатысып жатқан додада Қазақстанның төрт командасы да бірден үздік ондыққа енді, деп хабарлайды DKNews.kz.
Бұл нәтиже – тек жоғары дайындықтың ғана емес, тактикалық ойлау, төзімділік пен командалық үйлесімнің айқын көрінісі.
Турнир кестесінің көшбасында – Қазақстан
Бірінші жарыс күнінің қорытындысы бойынша қазақстандық командалар турнирдің жоғарғы бөлігін толық дерлік иеленді:
- Kazakhstan C – турнир кестесінің көшбасшысы
- Kazakhstan D – екінші орын
- Kazakhstan B – төртінші орын
- Kazakhstan A – үздік ондықты түйіндеп, оныншы орында
Халықаралық деңгейдегі мұндай жарыста бір елден төрт команданың бірдей топ жаруы – өте сирек кездесетін жағдай. Бұл Қазақстан спецназының жүйелі дайындық пен біртұтас мектепке сүйенетінін көрсетті.
Tomiris – әйелдер арасындағы абсолютті көшбасшы
Еліміздің Tomiris атты қыздар командасы да жоғары нәтиже көрсетті. Жалпы есепте 20-орынға тұрақтаған команда әйелдер құрамалары арасында бірінші орында тұр. Бұл – қазақстандық әйелдер спецназының да әлемдік деңгейде бәсекеге қабілетті екенін дәлелдейтін маңызды жетістік.
Бір тудың астындағы мықты құрам
Қазақстан атынан сынға түскен командалардың басты ерекшелігі – олардың бір тудың астына біріктірілуі. Құрамда:
- ҚР Мемлекеттік күзет қызметінің
- ҚР Ұлттық қауіпсіздік комитетінің
- ҚР Ішкі істер министрлігінің
арнайы мақсаттағы бөлімшелерінің ең үздік жауынгерлері бар. Әртүрлі құрылым өкілдерінің бір команда болып, бір мақсатқа жұмыс істеуі – турнирде шешуші рөл атқарып отыр.
Алда – ең күрделі кезеңдер
UAE SWAT Challenge бес күнге созылады және 11 ақпанда аяқталады. Алдағы күндері командаларды физикалық төзімділікке, дәлдікке, жылдам шешім қабылдауға және мінсіз үйлесімге негізделген ең күрделі тапсырмалар күтіп тұр.
Алғашқы күннің нәтижесі-ақ Қазақстанның бұл турнирге жай қатысушы емес, басты фавориттердің бірі ретінде келгенін көрсетті.
Командаларымызға келесі кезеңдерде де осы қарқыннан танбай, елге жеңіспен оралуын тілейміз.
Алға, Қазақстан!
