Қазақстанда Құрылтай депутаттарының сайлауына дайындық жалғасып жатыр.
Орталық сайлау комиссиясы бүгін шет мемлекеттер мен халықаралық ұйымдардың 60 халықаралық байқаушысын ресми түрде аккредиттеді. Бұл сайлау науқанын сырттан бақылайтын алғашқы халықаралық өкілдер.
Байқаушылар қай елдер мен ұйымдардан келеді?
ОСК мәліметінше, қазіргі уақытта үш халықаралық ұйым мен төрт шет мемлекеттен ұсыныстар түскен.
Олардың қатарында:
- ЕҚЫҰ Демократиялық институттар және адам құқықтары жөніндегі бюросының (ДИАҚБ) миссиясы – 32 байқаушы;
- ТМД-ның байқаушылар миссиясы – 4 адам;
- ТМД Парламентаралық Ассамблеясы – 19 адам.
Сонымен бірге Мальдив Республикасынан екі өкіл аккредиттеуге ұсынылды. Олардың бірі – осы елдің Сайлау комиссиясы төрағасының орынбасары.
Қазақстандағы дипломаттар да бақылауға қатысады
Аккредиттелгендердің қатарында Астанадағы дипломатиялық корпус өкілдері де бар.
Атап айтқанда:
- Палестинаның Қазақстандағы Елшісі;
- Венесуэланың Қазақстандағы Елшісі;
- Венгрияның Қазақстандағы уақытша сенімді өкілі.
ОСК: Байқаушылар тізімі әлі де толықтырылады
ОСК төрағасының орынбасары Мұхтар Ерман халықаралық бақылаушылар саны алдағы уақытта артуы мүмкін екенін айтты.
«Бүгінгі таңда Орталық сайлау комиссиясына аккредиттеу үшін 3 халықаралық ұйым мен 4 шет мемлекеттің 60 байқаушысының кандидатурасы ұсынылды. Атап айтқанда, ТМД байқаушылар миссиясынан – 4 адам, ТМД-ға қатысушы мемлекеттердің Парламентаралық Ассамблеясынан – 19 адам, ЕҚЫҰ ДИАҚБ байқаушылар миссиясынан – 32 байқаушы, сондай-ақ Мальдив Республикасы тарапынан 2 кандидатура, оның ішінде осы елдің Сайлау комиссиясы төрағасының орынбасары ұсынылды. Бұдан бөлек, Астанада аккредиттелген дипломатиялық корпустың дуайені болып табылатын Палестинаның Қазақстандағы Елшісі, Венесуэланың Қазақстандағы Елшісі және Венгрияның Қазақстандағы уақытша сенімді өкілі де аккредиттелді. Аккредиттеуге қатысты ұсыныстар келіп түсуіне қарай байқаушылар туралы мәліметтер жаңартылып отырады», – деді Мұхтар Ерман.
Орталық сайлау комиссиясының мәліметінше, халықаралық байқаушыларды аккредиттеу процесі жалғасып жатыр. Жаңа ұсыныстар түскен жағдайда олардың кандидатуралары қаралып, ресми тізім толықтырылады.
Бүгінгі отырыс қорытындысында ОСК шет мемлекеттер мен халықаралық ұйымдардың байқаушыларын аккредиттеу туралы қаулы қабылдады.
