Бавария Қазақстанмен ынтымақтастықты кеңейтуге мүдделі.
Қасым-Жомарт Тоқаев неміс өңірінің технологиялық мүмкіндіктерін Қазақстанның ресурстық және өнеркәсіптік әлеуетімен ұштастыруды ұсынып, екі ел арасындағы көлік байланысын күшейту қажеттігін айтты, деп хабарлайды DKNews.kz.
Президент 30 қыркүйекте Мюнхенде Бавария Премьер-министрі Маркус Зёдермен кездесті. Келіссөз Германияға ресми сапар аясында өтіп, Берлинде жасалған уағдаластықтарды нақты экономикалық жобаларға айналдыру мәселесіне арналды.
Бавария Берлиндегі уағдаластықтарды жүзеге асыруға қатысуы мүмкін
Тоқаев Мюнхендегі кездесуді Германияның Федералдық Президенті Франк-Вальтер Штайнмайер және Федералдық Канцлер Фридрих Мерцпен өткен келіссөздермен тікелей байланыстырды.
Мемлекет басшысы ендігі міндет қол жеткізілген уағдаластықтарды нақты нәтижеге айналдыру екенін айтып, бұл процесте Баварияны негізгі серіктестердің бірі ретінде қарастыратынын жеткізді.
«Баварияның өзіне тән ерекшелігін, экономикалық қуатын, инновациялық әлеуетін жоғары бағалаймын. Кеше Федералдық Президент Франк-Вальтер Штайнмайермен және Федералдық Канцлер Фридрих Мерцпен өте мазмұнды келіссөздер жүргіздім. Уағдаластықтарымызды нақты нәтижеге айналдыруға ниеттімін әрі аталған мәселеде Баварияны басты серіктес ретінде қарастырамын. Бұл – өнеркәсіп пен ғылымдағы өзінің озық жетістіктерін дәстүрге деген айрықша құрметімен ұштастырған өңір. Осы арқылы Бавария Германия экономикасын алға сүйреп, экономикамызды жаңғырту мен әртараптандыруда Қазақстанның сенімді серіктесі болып отыр», – деді Мемлекет басшысы.
Қазақстан өз ресурсын Бавария технологиясымен ұштастырмақ
Кездесудегі негізгі экономикалық формула тараптардың бірін-бірі толықтыратын мүмкіндіктеріне негізделді.
Қазақстанда ресурстық база мен өнеркәсіптік әлеует бар. Бавария инженерлік, өндірістік және технологиялық құзыреттерімен ерекшеленеді.
Тоқаев осы екі мүмкіндікті біріктіру үшін айтарлықтай әлеует бар екенін атап өтті.
Қазақстан үшін мұндай модель шетелдік капитал тартумен шектелмейді. Мақсат – экономиканы жаңғырту мен әртараптандыруға қажетті технологиялық шешімдерді өндірістік секторға енгізу.
Бұл бағыт Мюнхендегі басқа келіссөздерде де көрінді: Қазақстан неміс компанияларына дайын өнімді сататын нарық қана емес, технологиялар мен өндірісті орналастыратын алаң болуға ұмтылып отыр.
Қазақстан мен Германия көлік байланысын күшейтпек
Тоқаев екі ел арасындағы көлік қатынасын жақсарту мәселесін де көтерді.
Президенттің айтуынша, мұндай байланыстар Қазақстан мен Германияның экономикалық ықпалдастығын жандандырып қана қоймай, екі ел халқын жақындастыра түседі.
Көлік инфрақұрылымы өндірістік ынтымақтастық үшін де маңызды. Жаңа кәсіпорындар мен инвестициялық жобаларға жабдықты, шикізатты және дайын өнімді Еуропа мен Орталық Азия арасында тұрақты тасымалдау мүмкіндігі қажет.
Сондықтан логистика Қазақстан мен Германия арасындағы жаңа өнеркәсіптік жобалардың практикалық бөлігіне айналып отыр.
Маркус Зёдер Қазақстанмен жаңа өсім нүктелерін іздеуге дайын
Бавария тарапы да экономикалық қызығушылығын білдірді.
Маркус Зёдер Бавария жаңа өсім бағыттарын іздеуге айрықша мән беретінін және Қазақстанмен сан қырлы ынтымақтастықты нығайтуға мүдделі екенін жеткізді.
Ол Қазақстанда жұмыс істеп жатқан бавариялық компанияларға көрсетілген қолдау үшін Тоқаевқа алғыс айтты.
Бұл Қазақстан үшін Германиямен экономикалық байланысты тек федералдық деңгейде емес, елдің ірі өнеркәсіптік өңірлерімен тікелей дамыту мүмкіндігін береді.
Тоқаев Маркус Зёдерді Қазақстанға шақырды
Кездесу алдағы саяси және экономикалық диалогты жалғастыру ұсынысымен аяқталды.
Тоқаев Маркус Зёдермен Қазақстанда жүздесуді асыға күтетінін айтты.
Мюнхендегі келіссөздер Қазақстан мен Германия арасындағы инвестициялық байланысты нақты технологиялық және өнеркәсіптік жобаларға айналдыруға бағытталып отыр. Бұған дейін біз Қазақстан мен Германия құны шамамен $54 млрд болатын 40 инвестициялық жобадан тұратын портфель қалыптастырғанын жазған едік. Енді Бавария сол жобаларды технологиямен, өндірістік тәжірибемен және жаңа бизнес байланыстарымен толықтыра алатын негізгі өңірлердің бірі ретінде қарастырылып отыр.
