Әл-Фараби атындағы Қазақ ұлттық университетінде Абай күні онлайн форматта атап өтілуде, - деп хабарлайды Деловой Қазақстан.
Елбасы Нұрсұлтан Назарбаев: «Абай сөзі – қазақтың бойтұмары. Абай мұрасы – қазақтың ең қасиетті қазынасы. Абай адамзатты әділетке шақырып, өз қандастарын өзгелермен қатар тұра алатындай өнер-білімге, еңбексүйгіштік пен ыждағатқа үндеді», – деген болатын.
Ел Президенті Қасым-Жомарт Тоқаев «Абай – рухани реформатор» мақаласында: «Абай – біздің ұлтымыз бен жұртымызды танудың төте жолы. Ұлы ақын бізге мазмұндық тұрғыдан өлшеусіз, халықтың рухани азығына айналған мұра қалдырды», – дей келе, ХХІ ғасырға қадам бассақ та, Абай көзқарасының заманауи ізгілік қағидаттарына және Қазақстан қоғамының басты құндылықтарына, оның бірлігі мен берекесіне толықтай сай келетінін атап көрсетті.
Осы ретте қарашаңырақта ұлы ойшылдың мұрасын ұлықтауға арналған тағылымды шаралар ұйымдастырылып, арнайы бағдарлама әзірленді. Қазақтың бас ақынының туған күні қарсаңында «Ұлы ақын Абай Құнанбаевқа арнау» бейнеролигі дайындалып, 6 тамыздан бастап «Көзімнің қарасы» әніне ұлттық аспаптарда музыкалық челендж басталды. «Қазақ университеті» баспа үйі ақын шығармашылығынан байқау ұйымдастырып, жастар «Көзімнің қарасы» әніне бейнебаян түсірді. Абай ғылыми-зерттеу институты ақынның шығармашылық мұрасының өмірлік маңызы мен мәні туралы онлайн-конференцияны қолға алды. «Адамзаттың Абайы» атты мерекелік іс-шара (онлайн ZOOM) және фотокөрме мерекелік іс-шаралар қатарын толықтыра түспек.
Сондай-ақ бүгін тұғырлы тұлға туындыларынан терең тәлім алу әрі насихаттау мақсатымен барлық факультеттерде кураторлық сағаттар, дөңгелек үстелдер өткізілуде.
Айта кетсек, Президент тапсырмасымен 10 тамыз – Абай күні болып мемлекеттік мерекелер тізбегіне енгізіліп, өткен жылы алғаш рет атап өтілді.
Халқымыздың ұлы перзенті – Абай күні құтты болсын!
