Қазақстанда әл-Фараби атындағы Қазақ ұлттық университетімен серіктестікте Солтүстік-батыс политехникалық университетінің филиалы ашылды. Бұл оқиға Қазақстан мен Қытай арасындағы білім және ғылым саласындағы екіжақты қатынастарды нығайтудағы маңызды межеге айналды. Филиал студенттерге инженерия мен технологияның әртүрлі салаларында білім мен тәжірибе алудың бірегей мүмкіндіктерін ұсына отырып, аймақтағы білім мен ғылымды дамытуға ықпал етеді, деп хабарлайды DKnews.kz.
Солтүстік-батыс политехникалық университеті жоғары жетістіктерге жеткен және инновацияларға толы Қытайдың А санатындағы жетекші техникалық жоғары оқу орындарының бірі болып табылады. Университет «211-жоба» және «985-жоба» атты беделді ұлттық жобалар қатарына енгізілген, бұл оның негізгі білім беру және зерттеу мекемесі ретіндегі мәртебесін көрсетеді.
Қазақстандағы СБПУ филиалы материалтану, IT және телекоммуникация саласындағы магистратураның озық бағдарламаларын ұсынады. Осы бағыттардың түлектері зерттеу, әзірлеу және басқару саласында сұранысқа ие болады, өйткені бұл бағыттар бүгінде өте өзекті және келешегі зор салалар болып табылады.
Солтүстік-батыс политехникалық университеті сонымен қатар Huawei, Alibaba, Tencent, IBM, Microsoft және т.б. жетекші технологиялық корпорацияларда тағылымдамадан өту мүмкіндігін ұсына отырып, студенттердің мансаптық дамуына белсенді ықпал етеді. Тағылымдамалар студенттерге іс жүзінде құнды тәжірибе алуға, Іскерлік байланыстар орнатуға және оқу аяқталғаннан кейін осы көшбасшы компанияларда мансабын бастауға мүмкіндік береді.
Филиалдың басты ерекшелігі – студенттерге қытайлық және қазақстандық қос диплом алуға мүмкіндік беретін бірегей оқу бағдарламасы. Бұл артықшылық студенттерге таңдалған саладағы іргелі білім мен практикалық дағдыларды меңгеруге ғана емес, сонымен қатар жергілікті және халықаралық еңбек нарығында сұранысқа ие маман болуға мүмкіндік береді.
«Солтүстік-батыс политехникалық университетімен ынтымақтастық біздің студенттер мен оқытушылар үшін жаңа мүмкіндіктердің есігін ашады. Бірлескен білім беру бағдарламалары мен университеттеріміз арасында тәжірибе алмасу Қазақстандағы ғылыми зерттеулер мен инновациялық әзірлемелер қорын айтарлықтай байытады. Бұл жоба біздің студенттерімізге де, екі елдің ғылыми қауымдастығына да елеулі пайда әкелетін ұзақ мерзімді серіктестік үшін негіз болатынына сенімдіміз» Әл-Фараби атындағы ҚазҰУ Физика-техникалық факультетінің деканы Нұрзада Әбдібекқызы Бейсен
Талапкерлер әртүрлі гранттар мен стипендияларға ие бола алатынын, ал бұл өз кезегінде сапалы білім беруді одан да қолжетімді ететінін айта кеткен жөн. Университет көптеген қаржылық қолдау бағдарламаларын ұсынады, соның ішінде оқу гранттары, сондай-ақ жоғары академиялық жетістіктерге жеткен студенттерге арналған академиялық стипендиялар бар. Тағы бір маңызды артықшылық – Қытайда бір оқу жылын өткізу мүмкіндігі, бұл студенттерге басқа елдің мәдениеті мен ғылыми ортасына енуге, олардың көкжиегін кеңейтуге және кәсіби келешегін жақсартуға мүмкіндік береді.
«Қазақстанда филиалымыздың ашылуы Қазақ ұлттық университетімен стратегиялық әріптестігімізді нығайтудағы маңызды қадам болып табылады. Бұл ынтымақтастық елдеріміз арасындағы ғылыми-білім беру байланыстарын дамытудың негізгі факторы болатынына сенімдіміз. Біз қазақстандық студенттерге Қазақстанның инновациялық технологиялары мен экономикасының дамуына елеулі үлес қосуға мүмкіндік беретін әлемдік деңгейдегі білім алуға мүмкіндік бергеніміз үшін өте қуаныштымыз» Қазақстандағы Солтүстік-батыс политехникалық университеті филиалының Вице-президенті Чжэн Гуанхуа
Қазақстандағы Солтүстік-батыс политехникалық университетінің филиалында оқу – бұл студенттерге беделді білім алуға, әлемдік еңбек нарығында сұранысқа ие білім мен дағдыларды игеруге және ғылым, инженерия және технология салаларында табысты мансап құруға бірегей мүмкіндік.
Түрлі стипендиялар туралы толық ақпарат алу үшін сайтына кіріңіз.
