Астанада Қытай Халық Республикасының және Қазақстанның жоғары оқу орындарын бітірген, қытай тілін білетін түлектерге арналған бос жұмыс орындар жәрмеңкесі өтті. Бұл шара жыл сайын өткізілетін, осымен 4-ші рет ұйымдастырылып отырған шара. Жәрмеңкеге деген қызығушылық жыл өткен сайын артып келеді, жұмыс берушілер де, жұмыс іздеп жүрген қазақстандықтар да бұл шараға белсенді қатысуда.
Биылғы жылы жәрмеңкеге 200-ден астам адам қатысты. Ізденушілерге жұмыс орындарын ұсынған 24 қытайлық және қазақстандық-қытайлық бірлескен компаниялар, олардың қызметі мұнай-газ саласы, энергетика, жаңартылатын энергия көздері, жол құрылысы және т.б. салалармен байланысты.
Жәрмеңке жыл сайын Қытай жоғары оқу орындарының түлектері қауымдастығы мен Қазақстандағы Қытай сауда палатасының бірлескен күш-жігерінің арқасында өткізіледі. Іс-шараның ашылуында Қытай Халық Республикасының Қазақстан Республикасындағы Төтенше және Өкілетті Елшісінің кеңесшісі Ван Тао жәрмеңкенің маңыздылығын атап өтті, әсіресе «Бір белдеу, бір жол» бастамасы белсенді түрде бірлесіп салынуда және Қазақстан Орталық Азиядағы жетекші ел ретінде инвестиция тартуда тартымды болып келе жатыр.
«Қазақстанда Қытай қаржыландыратын кәсіпорындардың саны артып келеді, олар жергілікті жас таланттарды тарту арқылы бірге дамып келеді. Олар Қазақстанның экономикалық және әлеуметтік дамуына маңызды үлес қосып қана қоймай, Қытай мен Қазақстан халықтары арасындағы достықтың көпірін салуда. Қытайда білім берудің интернационализациялануымен қазақстандық жастардың Қытайда білім алуды таңдайтындары артып келеді, және ол қазақстандықтар арасында шетелде білім алу үшін танымал елдердің үштігіне енді. Қытайда оқып жатқан студенттер шын мәнінде «азаматтық дипломаттар» және Қытай-Қазақстан достығын нығайту ісіндегі мәдени елшілерге айналды» ҚХР-ның Қазақстандағы Төтенше және Өкілетті Елшісінің кеңесшісі Ван Тао
Ван Тао шілде айында ҚХР Төрағасы Си Цзиньпиннің Қазақстанға мемлекеттік сапарынан кейін түрлі салалардағы ынтымақтастықты дамыту үшін жаңа тарихи мүмкіндіктер ашылғанына және қытай кәсіпорындары мен Қытай ЖОО түлектері алдында үлкен перспективалар тұрғанына сенім білдірді.
Жәрмеңкенің өзектілігін, танымалдылығын және сұранысқа ие екенін Қытай жоғары оқу орындары түлектері қауымдастығының басшысы Жәмилә Елеусизова да атап өтті.
«Жәрмеңке қытай дипломының және білімінің маңыздылығын көрсетуге бағытталған. Түлектер Қытайда алған білімдерін бекер деп ойламауы тиіс. Біздің іс-шарамызда өз білімдеріне деген сұранысты нақты көруге мүмкіндік бар. Әр адам өз дағдыларын қолданып, Қазақстанда өз мамандығы бойынша жұмыс таба алады. Студенттер мен түлектерге көмек көрсетуге деген ұмтылыс бізді жыл сайын жәрмеңкеге қытай компанияларын көбірек тартуға итермелейді, осылайша қатысушылардың барлығын жұмыс орнымен қамтамасыз етуге тырысамыз» Қытай жоғары оқу орындары түлектері қауымдастығының басшысы Жәмилә Елеусизова
Сонымен қатар, жәрмеңке қатысушыларына бір жерде 20-дан астам жетекші қытайлық компания өкілдерінен бірден шағын сұхбаттан өтуге, жалақы мен жұмыс шарттары туралы толық ақпарат алуға мүмкіндік беріледі. Ұсынылатын бос орындар әртүрлі. Мысалы, бұл жолы «NFC Kazakhstan» құрылыс компаниясы Алматыдағы өкілдігінде жұмыс істеуге қытай тілін білетін аудармашы вакансиясын ұсынды. Ал «Kazakhstan Energy Investment» компаниясы Ақмола облысындағы нысанда әкімшілік, техникалық және өндірістік департаменттерде жұмыс істеуге мамандар іздеді.
«Әкімшілік департаментке жұмысқа тұру үшін міндетті түрде қытай тілін білу қажет. Техникалық департаментке жұмысқа орналасу үшін энергетика саласында білім қажет, қытай тілін білу міндетті емес. Жұмыс шарттары талқыланады. Жұмыс тәжірибесі жоқ адамдарға жалақы қолына 350 мың теңгеден төленеді. Қажет болған жағдайда мамандарды біліктілігін арттыру үшін Қытайға жібереді. Бізде 11 жоба бар: 9 жел және 2 күн электр станциясы. Әр түрлі облыстарда орналасқан. Өндіріс қызметкерлері мен техникалық департаменттегілердің мансаптық өсу мүмкіндіктері жоғары. Кейбір қызметкерлер төменгі позициялардан бастап білікті маман дәрежесіне дейін өседі. Біз жұмыс жәрмеңкесіне екінші рет қатысып отырмыз. Өткен жылы біз аудармашы қызды жұмысқа қабылдадық. Ол әлі де бізбен жұмыс істеп жатыр» «Kazakhstan Energy Investment» компаниясының менеджері Алина Шарипова
Жәрмеңкеге жастар да, 10 жылдан астам жұмыс тәжірибесі бар ересектер де келді. Кейбір жастарды ата-аналары ертіп әкелсе, енді біреулері Алматы, Павлодар, Ақтөбе сияқты басқа қалалардан арнайы келген.
«Мен 2018 жылы Чунцин қаласындағы университетте магистратураны бітірдім. Содан бері екі қытайлық компанияда жұмыс істедім және әлі де жұмыс істеп келемін. Ақтөбеде тұрамын. Бірақ үлкен қалаға көшкім келеді. Сондықтан әдейі Астана немесе Алматы қалаларында өзіме лайық жұмыс бар ма екен деп қарауға келдім. Қызықты вакансиялар көп. Мен барлық жерде түйіндемемді қалдырдым. Күтемін және үміттенемін. Мен алғаш рет қатысып отырмын және мұндай жәрмеңкелер әсіресе қандай компаниялардың бар екенін, олардың қандай жұмыстар ұсынатынын білмейтін адамдар үшін өте пайдалы деп ойлаймын. Негізінен мұнда ұсынылған барлық компанияларды білемін, бірақ олармен жеке байланысу өте қиын. Көшеден ешкім сені қабылдамайды. Ал мұнда барлығы бір жерде, сен оларға жақындап, отырып, сөйлесесің. Өте ыңғайлы» Жұмыс жәрмеңкесінің қатысушысы Жанар Бегалиева
Қатысушылардың арасында Конфуций институтының өкілдері де болды. Олар қытай мәдениетінің өкілдері ретінде барлық қатысушыларға қытай тілін жетілдіріп, өз курстарына жазылуды ұсынды. Қытай тарапынан Конфуций институтының басшысы Ян Лэйдің айтуынша, жәрмеңке қатысушыларының 80%-ының жүзі оларға таныс. Демек, олардың көбі - олардың оқушылары.
«Біз әрқашан жұмыс жәрмеңкесіне қатысамыз. Себебі Конфуций институтының миссиясы – қазақстандық азаматтардың бәсекеге қабілеттілігін арттыру. Біз тек қытай тілін үйретіп қана қоймай, жұмысқа орналасуға да көмектесеміз, жұмыс орындары туралы хабарландыруларды инстаграмдағы парақшаларымызда жариялаймыз. Менің ойымша, Қытай жоғары оқу орындары түлектері қауымдастығы мен Конфуций институты әрқашан ел экономикасының өсуін ынталандыратын жұмыс орындарын құруға күш салады, және мұндай жәрмеңкелерді жиі өткізу керек» Л.Н. Гумилев атындағы ЕҰУ жанындағы Конфуций институтының директоры Ян Лэй
Жұмыс жәрмеңкесі әзірге тегін өткізіледі. Бірақ келесі жылдан бастап ұйымдастырушылар қатысу үшін төлем енгізуі мүмкін. Сондай-ақ, олар Алматыда да осындай іс-шаралар өткізуді жоспарлап отыр, онда екіжақты сұраныс бар.
Саида Жарқынова
