Қазақстандық ғалымдар диагностика жасауға және оңалтуға арналған инновациялық AI-сенсор ойлап тапты, деп хабарлайды DKnews.kz.
Қазақстандық ғалымдар аутизмі бар балалар мен тірек-қимыл аппараты бұзылған пациенттерді диагностикалауға және оңалтуға көмектесетін Mirai Gait инновациялық сенсорларын әзірледі. Бұл сенсорлар қозғалыстарды бақылауға, асимметрияны анықтауға және қалпына келтіру процесін нақты уақыт режимінде басқаруға мүмкіндік береді. Сенсорлар жоғары дәлдікпен өлшеулер жүргізеді және медициналық мамандарға диагностика мен емдеу процесін жақсартуға көмектеседі.
Аталмыш жобаны 6-7 желтоқсан күндері Nazarbayev University-де өткен IV YRA Forum аясында техника ғылымдарының докторы, Nazarbayev University профессорының ассистенті Гүлнұр Қалимулдина таныстырды. Стартап NURIS бизнес инкубациясын өтуде және қазіргі уақытта екі патентке ие, тағы екі патент тіркеуден өтіп жатыр.
Mirai Gait технологиялары қазір Астанадағы InMotion спорттық клиникасында сынақтан өтіп жатыр. Алдағы уақытта халықаралық патенттеу мен медициналық мекемелермен ынтымақтастықты кеңейту жоспарлануда.
2024 жылғы деректерге сәйкес, Қазақстанда 17 000-нан астам бала аутизм спектрінің бұзылыстары (АСБ) диагнозымен тіркелген, ал тірек-қимыл аппаратының аурулары күннен-күнге көбейіп келеді. Mirai Gait бұл мәселелерді шешуге арналған практикалық шешім ұсынып отыр, бұл мыңдаған науқастардың өмір сапасын жақсартады және Қазақстанды инновациялық жобалардың орталығы ретінде танытады деп күтілуде.
