Қазақстан Республикасы Ұлттық ұланы Бас қолбасшылығының базасында әскердің батальон буыны офицерлерінің арасында “Үздік әдіскер — батальон командирі", "Үздік әдіскер — штаб бастығы", "Үздік әдіскер — батальон командирінің тәрбие және әлеуметтік-құқықтық жұмыстар жөніндегі орынбасары" байқауының ақтық сыны өтті, деп хабарлайды DKnews.kz.
Іс-шараның негізгі мақсаты — офицерлердің кәсіби дағдыларын дамыту, жеке құрамды оқыту және тәрбиелеу әдістемелерін жетілдіру, сондай-ақ әскери саладағы үздік тәжірибелермен алмасу болды.
Марапаттау рәсімінде Ұлттық ұлан Бас қолбасшысының орынбасары генерал-майор Бауыржан Әбжанов сөз сөйледі.
Жеңімпаздарды, жүлдегерлерді және барлық қатысушыларды байқаудың қорытынды кезеңінің аяқталуымен құттықтаймын! Әрқайссыңыз керемет күш, кәсібилік пен табандылық таныттыңыздар. Бас қолбасшылық қабырғасында шешуші кезеңде бақ сынаудың өзі — үлкен жеңіс. Сіздерге қызметте табыс, жаңа жеңістер мен жетістіктер тілеймін Бауыржан Садықұлы
- Мен осы беделді байқаудың жүлдегерлері қатарында тұрғаныма өте қуаныштымын. Осы үш күнде біз барымызды салдық және менің ойымша, әр қатысушы жеңіске лайық екенін көрсетті. Мен үшін бұл байқауға қатысу — нағыз сынақ және кәсіби тұрғыда өсу үшін зор ынталандыру болды. Алған білім мен тәжірибе бізге алдағы уақытта қызметімізде көмектесетініне сенімдімін, - деді үміткердің бірі капитан Жүрсін Қабдешұлы.
Байқау қорытындысы бойынша төмендегі әскери қызметшілер жеңімпаз атанды:
- “Үздік әдіскер — батальон командирі” полковник Рауан Усбанов, Ұлттық ұлан академиясы 1 оқу батальонының командирі (Петропавл қ.);
- “Үздік әдіскер — штаб бастығы” капитан Исатай Нұрсейітов, 5548 әскери бөлімі батальоны командирінің орынбасары (Жаңаөзен қ.);
- “Үздік әдіскер — батальон командирінің тәрбие және әлеуметтік-құқықтық жұмыстар жөніндегі орынбасары” капитан Жүрсін Қабдешұлы, 5547 әскери бөлімі батальон командирінің тәрбие және әлеуметтік-құқықтық жұмыстар жөніндегі орынбасары. (Қызылорда қ.)
Байқау қорытындысы бойынша жеңімпаздар мен жүлдегерлері Ішкі істер министрінің орынбасары — Ұлттық ұлан Бас қолбасшысының атынан дипломдармен, кубоктармен, грамоталармен және бағалы сыйлықтармен марапатталды.
