Премьер-министрдің тапсырмасына сәйкес Еңбек және халықты әлеуметтік қорғау министрлігі цифрлық ведомствомен бірлесіп Отбасының цифрлық картасында әкімдер рейтингінің мониторингінің автоматтандырылған функционалын әзірледі, деп хабарлайды DKnews.kz.
Талдау әр аудан, қала және облыс бойынша жүргізілуде. Бұл туралы Үкімет отырысында еңбек және халықты әлеуметтік қорғау министрі Светлана Жақыпова баяндады.
Төрт айлық жұмыстың нәтижесі Шығыс Қазақстан облысының Риддер қаласының мысалы арқылы көрсетілді. 1 желтоқсанға дейін 3643 әлеуметтік осал отбасы қалды, олардың 270-і D санатынан шықты. Қалада жасанды интеллект әл-ауқатқа әсер ететін ең маңызды 3 факторды анықтады: кірістер, тұрғын үй, жұмысқа орналасу. 177 отбасы жұмысқа орналасу және кірістерін арттыру арқылы жағдайын жақсартты.
Министрдің айтуынша, деректер eOtinish, 109 қызметімен, Отбасының цифрлық картасымен біріктірілген. Жасанды интеллект әлеуметтік осал санаттар бойынша жүгіну салаларын таңдайды. Бұл сотқа дейінгі іс жүргізу, қоғамдық және жол қауіпсіздігі, тұрғын үй-коммуналдық шаруашылық мәселелері, жерге және жерді пайдалануға, сот ісін жүргізуге қатысты мәселелер.
Жасанды интеллект сонымен қатар әкімдерге тікелей жұмыс істеу керек мәселелерді анықтайды. Мысалы, Риддер қаласындағы проблемалар – бұл міндетті зейнетақы жарналарын төлемейтін отбасылардың айтарлықтай саны, бұл жұмыссыздықтың немесе бейресми сектордағы жұмыспен қамтудың жоғары деңгейін көрсетуі мүмкін.
Премьер-министр бұл жағдайдың Қарағанды облысы Осакаров ауданында қалай екенін көрсетуді ұсынды.
Аталған аумақта қазіргі уақытта әлеуметтік осал санаттағы 2382 отбасы тұрады. Динамика оң. Тәуекел аймағының маңызды факторларының қатарына кірістер мен жұмысқа орналасу кіреді. Білім беру, мемлекеттік басқару, құжаттамалық қамтамасыз ету салаларындағы шағымдар тіркеледі. ЖИ ұсынымдарының бірі – ауданның әлеуметтік-экономикалық дамуының нысаналы бағдарламасын әзірлеп, енгізу. Жаңа жұмыс орындарын, әсіресе тұрақты табыс әкелетін салаларда жұмыс орындарын ашу маңызды бағыт болуы тиіс.
«Бұл біз жүзеге асыра алатын бастапқы кезең. Қазір біздің алдымызда Еңбек тәуекелдерінің картасымен тікелей интеграциялау міндеті тұр, онда әкімге зейнетақы жарналарын аудармай, жалақы бойынша берешекке жол беретін кәсіпорындардың нақты атаулары көрсетілетін болады. Сондай-ақ бізде құны 33 млн теңге болатын 755 жобаның инновациялық навигаторы бар, олар 150 мың жұмыс орнын ашу арқылы жүзеге асырылуда» Светлана Жақыпова
Деректер әр аймақ, әр елді мекен бойынша жүргізіледі. Премьер-министр жасанды интеллект беретін ұсыныстарға назар аударды.
«Осакаров ауданы бойынша жасанды интеллект қазірдің өзінде әлеуметтік жағынан аз қорғалған отбасылармен қалай айналысуға болатыны туралы ұсыныстар беруде. Мұндай ұсынымды барлық әкімдерге апта сайын жіберіп, ақпаратты автоматты режимде өзектендіру қажет болады. Әр әкім қай жерде қандай проблемалар бар екенін көруі тиіс. Бұл жасанды интеллектіні қолданудың тікелей пайдасы. Оны өздері де талдауға болады, бірақ оған қанша ресурстар мен уақыт қажет» Олжас Бектенов
