Талдықорғанда ел Президентінің балаларға арналған «Қош келдің, Жаңа жыл!» атты Жаңа жыл шыршасы өтіп, онда аудан-қалалардан келген 200 баланы облыс әкімі Бейбіт Исабаев құттықтады, деп хабарлайды Жетісу облысы әкімінің баспасөз қызметі, деп хабарлайды DKnews.kz.
«Жастар» Спорт сарайында өткен мерекелік шараға көп балалы, аз қамтылған, толық емес отбасыларынан шыққан балалар, жетім балалар, ерекше қажеттілігі бар балалар, оқу озаттары, өнерлі өрендер келді.
Фотограф: Жеңіс Ысқабай
Мерекелік шара флешмоб биімен басталды. Мұнан соң экранда ел Президентінің фотосы мен балаларды Жаңа жылмен құттықтауы көрсетілді.
Жаңа жыл көңілге қуаныш, жүрекке үміт сыйлайтын, игі арман-тілектер еселенетін мереке. Сондықтан әрқашан армандарың асқақ, алар асуларың биік болсын дегім келеді. Мемлекет басшысы Қасым-Жомарт Кемелұлы Тоқаев өздеріңді ыстық ықыласпен құттықтап, жақсы тілегін білдіруде. Мен өз замандастарының ішінде мол білімімен, жарқын өнерімен алда жүретін жетісулық бүлдіршіндердің болашақта ел игілігі үшін аянбай қызмет ететін азамат болып өсетіндігіне сенімім мол Бейбіт Исабаев
Фотограф: Жеңіс Ысқабай
Бұдан әрі шырша шамы жағылып, облыс әкімі балалармен бірге шыршаны айналып, қуаныштарын бөлісті. Балаларға Президенттің атынан Жаңа жылдық сыйлықтар, атап айтқанда планшет, рюкзак, жаңа жылдық тәттілер, құттықтау хатын тапсырды.
Фотограф: Жеңіс Ысқабай
Түрлі өнер ұжымдары, аниматорлар, колундар, ертегілер мен мультфильмдер кейіпкерлері мерекелік қойылымдарын көрсетті. Балаларға түрлі ойындар ұйымдастырылып, тәтті дәмдер ұсынылды.
Фотограф: Жеңіс Ысқабай
Бүгінгі мерекеге келген балалар тамаша көңіл күйде пікір білдірді.
Мен көп балалы отбасынан шыққан оқу озатымын. Үйде 8 қызбыз, бәріміз бір-бірімізбен татумыз. Бүгінгі Президенттің жаңа жыл мерекесі өте көңілді өтіп жатыр. Барша достарымды жаңа жыл мерекесімен құттықтаймын Панфилов ауданы Басқұншы ауылындағы мектептің оқушысы Айша Алжанбек
Бүгінгі мереке маған өте ұнады. Көпшіліктің алдына шығып, тілегімді айттым. Бізге Жаңа жылға планшет сыйға тартты. Шырша тойы бізге көтеріңкі көңіл күй сыйлады «Айналайын» балалар үйінің тәрбиеленушісі Людмила Ким
Мен «Алтын сақа», «Ақбота», «Кенгуру» олимпиадаларының жеңімпазымын. Бүгінгі мерекеге қуана-қуана келдім. Аяз Атамен, Ақшақармен, түрлі ертегі кейіпкерлерімен бірге ән айтып, билеп, ойын ойнап, Жаңа жылды көтеріңкі көңіл күймен тойладық Сәкен Әбілмансұр, Талдықорған қаласының № 16 мектеп-гимназиясының 4 сынып оқушысы
