Ұлттық ұланның «Шығыс» өңірлік қолбасшылығына қарасты 3477 әскери бөлімі командирінің тәрбие және әлеуметтік-құқықтық жұмыстар жөніндегі орынбасары Аңсар Шәкенов мерзімінен бұрын подполковник шенін алды, деп хабарлайды DKnews.kz.
Әскери шен Ұлттық ұланның құрылғаны күніне орай Ішкі істер министрінің бұйрығымен берілді. Офицер қызмет атқарған әрбір әскери бөлімде үлгі болар ілкімді істер атқарып, әскери қызметшілердің жауынгерлік рухын көтеруде аянбай еңбек етіп келеді. Әсіресе, әскери бөлімдегі моральдық-психологиялық қамтамасыз ету, әскери ұжымдарда достық ахуалды қалыптастыру, бірлікті сезіну мен міндеттердің ортақтығын түсіне білуде тәрбие құрылымдарының маманы заманауи жаңашыл әдістерге иық артып, әрдайым ізденіс үстінде жүреді.
Аңсар Шәкенов 1990 жылы Солтүстік Қазақстан облысы Петропавл қаласында дүниеге келген. Кеңес Одағының батыпы, әскери қолбасшы Бауыржан Момышұлының ерлікке толы өміріне балаң шағынан қанық боп, даңқты жауынгерді үлгі тұтқан ол 2008 жылы Петропавл қаласындағы Қазақстан Республикасы Ұлттық ұланының Академиясына оқуға түседі. Аңсар өзінің көкжиегінің кеңейіп, жауапкершілікті сезініп, жан-жақты өсіп-толуына академия қабырғасы мұрындық болғанын алға тартады.
Офицер Ұлттық ұлан сапындағы қызметін «Шығыс» өңірлік қолбасшылығына қарасты 5512 әскери бөлімінде бастайды. Павлодар қаласындағы әскери бөлімінде ұландық рота командирі орынбасарынан бастап, тәрбие және әлеуметтік-құқықтық жұмыстар бөлімінің бастығына дейін абыройлы түрде сегіз жыл табанды қызмет атқарады. 2020 жылы Өскемен қаласындағы 5518 әскери бөліміне ауысып, батальон командирінің тәрбие жөніндегі орынбасары лауазымында қажырлы еңбек етсе, ал 2022 жылдан бастап бүгінге дейін 3477 әскери бөлімі командирінің тәрбие және әлеуметтік-құқықтық жұмыстар жөніндегі орынбасары лауазымында қызмет атқарып келеді.
Жауынгерлердің жай-күйі мен тәрбиесі мен тәртібін, сондай-ақ олардың алдында тұрған міндеттерін жоғары деңгейде жүзеге асуына мән беретін подполковник бос уақытында көне ғасырдан сыр шертетін тарихи кітаптар оқығанды әдетке айналдырған. Білікті де білімді офицер Аңсар Шәкеновтің Ұлттық ұлан сапында әлі талай асуларды бағындырып, әскери тәртіппен мәдениетті қалыптастыруда қарқынды қызмет атқаратындығына сенім мол.
