2025 жылғы 21–23 наурыз күндері Алматы қаласында Наурыз мерекесіне орай «Тәтті кәде-сый сыйлыққа» акциясы ұйымдастырылды, деп хабарлайды DKnews.kz.
Бұл шара Алматы қаласының Туризм басқармасының, Алматы халықаралық әуежайының, Алматы шекаралық бақылау қызметі мен «Жетісу» кеден бекетінің бірлескен бастамасымен жүзеге асырылуда. Акцияның негізгі мақсаты — қалаға келген шетелдік туристерге мерекелік көңіл-күй сыйлау және қазақ халқының қонақжайлығын көрсету. Осы шара аясында Алматыға келген шамамен 10 мыңға жуық шетелдік жолаушыға сый-құрмет көрсетіледі.
Акция барысында әрбір турист, Алматыға келіп қонғаннан кейін, халықаралық жолаушылар терминалындағы паспорттық бақылау мен кедендік тексеру аймақтарында ұлттық ою-өрнектермен безендірілген және көктемнің символдарымен нақышталған тәтті кәде-сый — ұлттық тәттілерін алады. Бұл іс-шара Қазақстанның бай мәдени мұрасын таныстыруға және Алматыға келген қонақтарда осы қала туралы жылы әрі жағымды естеліктер қалдыруға бағытталған.
Әуежайда сондай-ақ арнайы фотозона ұйымдастырылып, ұлттық нақыштағы баннерлермен безендірілді.
Жолаушыларға қазақтың дәстүрлі киімдеріне (шапан) киініп, естелік суретке түсу мүмкіндігі беріледі. Әркім ұлттық киімде өзін қазақ халқының қонақжайлық дәстүрінің бір бөлшегі ретінде сезініп, ұмытылмас естеліктермен қалаға қошемет білдіреді.
Алматы — шетелдік туристер үшін Қазақстанның ең танымал қалаларының бірі. Қала елдің халықаралық туризм ағынының 52,3%-ын қабылдай отырып, өз тарихы, мәдениеті мен табиғатымен әлемнің түкпір-түкпірінен келген саяхатшылар үшін тартымды орталық болып қала береді.
