Батыс Қазақстан облысының Шыңғырлау ауылында тәжік-ауға шекарасында қаза тапқан жауынгерлерді еске алу шарасы өтті, деп хабарлайды DKnews.kz.
Ескерткіш маңына Ішкі әскер ардагерлері, интернационалист-жауынгерлер, күш құрылымдарының өкілдері, ауыл тұрғындары мен марқұмдардың туған-туыстары жиналып, қаза тапқан сарбаздарға тағзым етті.
2025 жылдың 7 сәуірінде Тәжікстанның Пшихавр шатқалында қазақстандық әскери қызметшілердің ерлікпен шайқасқанына 30 жыл толады. 1995 жылы командир Ерлан Алданазаровтың басшылығымен 7-ші рота өздерінен саны көп моджахедтермен ұрысқа түсіп, ТМД шекарасын қорғады. Бұл шайқас бес сағатқа созылып, қазақстанның бітімгер контингенті тарихындағы ең ауыр оқиғалардың бірі ретінде есте қалды.
Митингке сол қанды оқиғаның тікелей куәгерлері – өз серіктерін қорғап, иық тіресіп соғысқан жауынгерлер қатысты.
Қатысушылар шайқаста қаза тапқан 17 әскери қызметшіні, соның ішінде жерлесіміз Радик Қаймулдиновты бір минут үнсіздікпен еске алып, ескерткішке гүл шоқтарын қойды.
Біз бүгін өз өмірін сарп етіп, әскери және азаматтық борышын адал атқарған батырларды еске алу үшін жиналдық. Біздің ортақ міндетіміз – олардың ерлігін ұмытпай, келер ұрпаққа жеткізу. Сонымен қатар, Отан үшін нағыз қаһарман ұлдар тәрбиелеген аналарға басымызды иеміз «Батыс» өңірлік қолбасшылығының тәрбие және әлеуметтік-құқықтық жұмыстар басқармасының бастығы полковник Жандос Күлбаев
Митингтен кейін қатысушылар марқұм Радик Қаймулдинов білім алған мектепке барды. Одан кейін «Қазбат» батырларына арналған автошеру ұйымдастырылды.
