Елорда бірнеше жылдан бері «Халық қатысатын бюджет» жобасы сәтті жүзеге асып келеді, деп хабарлайды DKnews.kz.
Соның арқасында астаналықтар өз аулаларын абаттандыру, жарықтандыруды жақсарту және жайлы қалалық ортаны құру бойынша ұсыныстар енгізу үдерісіне белсенді қатысуға мүмкіндік алды, деп хабарлайды Астана әкімдігінің ресми сайты.
Жоба қазір елорданың барлық алты ауданында жүзеге асып жатыр.
Бағдарлама 7 кезеңнен тұрады: сарапшылық кеңесті құру, өтінімдер қабылдау, жобалық ұсыныстарды талдау, дауыс беру, қорытындылау, жұмыс жоспарларын әзірлеу және жүзеге асыру.
Елорданың Сарыарқа ауданында 2025 жылдың 20 қаңтары мен 1 наурызы аралығында өтініштерді қабылдау кезеңінде тұрғындардан 73 жобалық ұсыныс түскен. Сараптамалық кеңес барлық өтінішті қарап, 43 жобаны дауыс беруге мақұлдады.
Үздік абаттандыру жобаларына дауыс беру кезеңі 6-24 сәуір аралығында Сарыарқа ауданы әкімдігінің сайтында өтеді. Тұрғындар Egov Mobile қосымшасында дауыс беру арқылы жүзеге асыру үшін үздік жобаларды таңдайды. Ең көп дауыс жинаған жобалар 2026 жылғы құрылыс маусымында жүзеге асырылады.
Нұра ауданының тұрғындары « Халық қатысатын бюджет-2025» бағдарламасының қорытындысын шығарып үлгерді. Дауыс беру қорытындысы бойынша биылғы жазда 10 аула күрделі жөндеуден өтеді. Оның ішінде 8 жобалық ұсыныс ең көп дауыс жинап, жеңімпазы атанды.
Бағдарлама аясында 74 өтінім беріліп, оның ішінен сараптамалық кеңес жетілдіру критерийіне сәйкес келетін 15 жобаны таңдап алды. Олардың тең жартысы қала тұрғындары тарапынан барынша қолдау тапты. Бұл жобаларды жүзеге асыру сәуір айының ортасында басталып, жұмыстарды қыркүйектің екінші жартысында аяқтау жоспарланып отыр.
1 наурызда Сарайшық ауданында өтініш қабылдау аяқталды. Сараптамалық кеңес дауыс беру кезеңіне 36 жобаны мақұлдады.
Дайын жобалар аудан әкімдігінің ресми сайтына жүктеледі, онда «Халық қатысатын бюджет-2025» қосымша беті бар. Техникалық талдау мен тексеруден кейін өтінімдер дауыс беру кезеңіне өтеді.
Байқоңыр ауданында дауыс беру 5-24 сәуір аралығында өтеді. 2025 жылдың 20 қаңтары мен 1 наурызы аралығында аудан тұрғындары 9 жобалық ұсыныс енгізді. Олардың барлығы келесі кезеңге – дауыс беруге өтті.
Алматы ауданы әкімдігіне тұрғындардан 123 өтініш келіп түскен. Оның 107-сі 5 сәуірде басталатын дауыс беруге құқылы. Есіл ауданында тұрғындар 23 қаңтар мен 1 наурыз аралығында өтініш бере алды. Сараптамалық кеңес 109 жобаның 58-ін мақұлдады. Келесі кезең 6-24 сәуір аралығында өтеді.
