Республикалық қан қызметінің еріктілері Ермек Дүйсенханов пен Арман Сатимов қан донорлығының маңыздылығын насихаттау үшін Қазақстанды аралап, 17 күндік автосапарға шықты. Әр қалада олар шағын дәрістер өткізіп, ақпараттық материалдар таратып, жергілікті тұрғындармен және БАҚ өкілдерімен кездесулер ұйымдастыруда, деп хабарлайды DKnews.kz.
Маршрут ірі қалаларды ғана емес, шалғай ауылдарды да қамтиды, себебі донорлық — әр адам үшін қолжетімді болуы тиіс.
Жобаға алты облыстың әкімдіктері қолдау көрсетіп отыр. Қан орталығының логотипі бар көлікпен еріктілер Астана, Қостанай, Хромтау, Ақтөбе қалаларын артта қалдырып, Ақтауға жетті.
Сонымен қатар, амбассадорлар экология, табиғатты сақтау, ауылдық өңірлерді дамыту және тарихи мұраны қорғау мәселелерін де көтеруде.
«Мұндай бастамалар — бұл тек донорлықты ілгерілету ғана емес, бұл қоғамда жанашырлық, қамқорлық пен өзара көмектесу мәдениетін қалыптастыруға қосқан үлес. Біз өз еріктілерімізбен мақтанамыз!», — дейді Қан орталығының басшысы Сәния Әбдірахманова.
Дәрістерден кейін еріктілер қазақстандықтармен бірге Қан орталығының логотипі бейнеленген арнайы жабдықталған көлікке қызыл нүктелер жапсырады. Қазірдің өзінде ондаған нүкте жапсырылған және олардың саны артып келеді. Бұл — донорлық туралы білетін адамдар қатары көбейіп жатқанын білдіреді.
«Адам донор болған кезде, өзін қажет, маңызды тұлға ретінде сезінеді. Ол өзінен көп нәрсе тәуелді екенін түсіне бастайды және қоғам өмірінің өзге де мәселелеріне белсенді араласады. Донор — бұл жүйе онсыз жұмыс істей алмайтын адам. Бір жерде біреудің өмірін дәл сол адамның қаны сақтап қалуы мүмкін», — дейді Қан орталығының ерікті-амбассадоры Арман Сатимов.
