«Сақтандыру төлемдеріне кепілдік беру қоры» АҚ Қаржы нарығын реттеу және дамыту жөніндегі агенттігінің қолдауымен нарықтағы түрлі сақтандыру ұсыныстарын таңдау мен салыстыруды жеңілдету үшін арнайы онлайн-сервисті іске қосты, деп хабарлайды DKnews.kz.
Сақтандыру өнімдерінің анықтамалығы тұтынушыларға түрлі компаниялардың сақтандыру өнімдері жөнінде толыққанды ақпарат табуға көмектеседі, талаптарды егжей-тегжейлі зерттеу үшін сақтандырушының веб-сайтына тікелей кіруге мүмкіндік береді, бұл оңтайлы сақтандырумен өтеуді таңдау процесін айтарлықтай жеңілдетеді.
Сақтандыру - бұл өзіңізді, мүлкіңізді және жақындарыңызды күтпеген оқиғалардың қаржылық салдарынан қорғаудың сенімді тәсілі. Сақтандыру полисі қаржылық қауіпсіздік жастығы ретінде әрекет етеді, ол денсаулыққа, көлікке немесе жазатайым оқиғаға байланысты күтпеген шығындарды еңсеруге көмектеседі.
Сақтандыру шартын жасасу – жауапты қадам екенін атап өткен жөн. Сақтандыру шартына қол қоймас бұрын оның талаптарын мұқият зерделеп, сақтандыру қолданылатын сақтандыру тәуекелдері мен оқиғаларының тізбесіне, сондай-ақ франшизаның болуына ерекше назар аудару қажет. Шартта төлемді алу үшін қажетті құжаттардың және оны жүзеге асыру мерзімдерінің нақты жазылғанына көз жеткізу қажет.
Әртүрлі сақтандыру түрлері жағдайында құжаттар тізімі әр түрлі болуы мүмкін екенін есте ұстаған жөн. Шартты мұқият зерделеу қажет, себебі кез-келген түсініксіздіктер болашақта сақтандыру төлемін алуға кедергі келтіруі мүмкін. Тұтынушы ерікті сақтандыру шартына, егер ол ҚР заңнамасына қайшы келмесе, өзгерістер енгізуге құқылы.
Бүгінгі таңда сақтандыру компаниялары тұтынушыларға сақтандыру өнімдерін онлайн-ресімдеудің ыңғайлы мүмкіндігін ұсынады. Тұтынушының кеңсеге бармай-ақ полисті ресімдеу мүмкіндігі бар. Тұтынушылардың ыңғайлылығы мен қауіпсіздігі үшін барлық сақтандыру компанияларының ресми сайттарына сілтемелер «Мемлекеттік кредиттік бюро» АҚ сайтында орналастырылған.
Қазақстанның сақтандыру секторын 25 компания ұсынады, олардың ішінде 15 жалпы сақтандыру компаниясы және 10 өмірді сақтандыру компаниясы бар. Олардың әрқайсысы тұтынушылардың қаржылық қауіпсіздігін қамтамасыз етуге арналған сақтандыру өнімдерінің кең таңдауын ұсынады. Әрбір өнім бойынша сақтандыру шарттары сақтандыру компанияларының ресми сайттарында міндетті түрде орналастырылатын сақтандыру қағидаларында егжей-тегжейлі баяндалған.
