Almaty Theatre сахнасында «Астана Балет» театрының симфониялық оркестрі өнер көрсетті, деп хабарлайды DKnews.kz.
Almaty Theatre сахнасында «Алматыдағы жыл мезгілдері» атты концерт өтті. Концертке «Астана Балет» театрының симфониялық оркестрі мен әлемге әйгілі отандық скрипкашы Ержан Күлібаев қатысты.
Бағдарламада танымал композиторлардың, аргентиналық Астор Пьяццолла мен италиялық Антонио Вивальди туындылары орындалды. Жыл мезгілдері тақырыбындағы шығармаларды өнерпаздар жарқын эмоциямен, асқан шеберлікпен әсерлі баяндап берді.
Ержан Күлібаев — қазіргі заманның ең жарқын жас скрипкашыларының бірі, әлемнің үздік сахналарында Қазақстанды танытып жүрген халықаралық деңгейдегі музыкант. Көптеген беделді марапаттардың иегері. Ол көрерменді тек орындау шеберлігімен ғана емес, сахнадағы ерекше харизмасымен де баурап алды.
Өнерпаз 1722 жылғы сирек кездесетін Страдивари скрипкасында ойнап, көрерменді шебер техникасымен, әсерлі үнімен тәнті етті.
«Алматылық жыл мезгілдері» концерті көктемгі маусымның нағыз жарқын музыкалық оқиғасына айналып, көрерменге ұмытылмас кеш сыйлады.
