Би – бұл жай ғана қимыл емес. Бұл – сөзсіз де бүкіл бір хикаяны баяндай алатын тіл.
Ақтаулық 13 жастағы Айяла Ерланқызы үшін би – қызығушылық қана емес, шынайы өмірдің мәні, жанның ұшуы мен өзін-өзі білдірудің жолы. Оның әрбір өнер көрсетуі – көрерменді баурап алатын энергия, құштарлық пен кәсібилікке толы.
Айяла бала кезінен ерекше еңбекқорлық пен табандылық танытып келеді. Ол 4 жасынан бастап Ақтаудағы «Formation» спорттық бимен айналысатын клубта кәсіби жаттықтырушы Анастасия Свирскаяның жетекшілігімен дайындалып жүр. Алғашқы медальдарын небәрі 5 жасында иеленген Айяла бүгінде Қазақстанда және шетелде өткен көптеген беделді жарыстардың жеңімпазы атанды.
Жас чемпион әлемдік би ареналарында жарқырай көрінді: ол Қытайда өткен Еуразия елдерінің жасөспірімдеріне арналған латынамерикалық билер бойынша ашық әлем чемпионатында топ жарып, сондай-ақ 2024 жылғы «Chisinau Stars» халықаралық турнирінде (Молдова) жеңіс тұғырынан көрінді.
Айяла – Маңғыстау облысы бойынша Мемлекеттік кірістер департаментінің қызметкері Ерлан Түйебаевтың қызы. Ол тек құрдастарына ғана емес, әкесінің әріптестеріне де шабыт сыйлап, Департамент ұйымдастыратын іс-шараларда өз өнерін паш етіп жүр.
Спорттық-бал билері – бұл нәзік қозғалыс қана емес, сондай-ақ бала бойында жан-жақты қабілеттерді дамытатын сиқырлы өнер. Күш пен төзімділік, икемділік пен үйлесімділік, музыкалық есту мен сахнада серіктеспен үндесу – мұның бәрі дайындық пен жаттығулар арқылы қалыптасады.
Айяла Ерланқызы – отбасының қолдауы мен тынымсыз еңбектің арқасында биік белестерді бағындыруға болатынын дәлелдеген жарқын үлгі. Оның би жолы енді ғана басталды деуге болады. Әлем енді осы жас жұлдыздың жаңа жетістіктерін тағатсыздана күтуде.
