Атырау қаласындағы Тасқала спорт кешенінде ҚР Ұлттық ұланы “Батыс” өңірлік қолбасшылығының ұйымдастыруымен қоян-қолтық ұрыстан біріншілік өтті, деп хабарлайды DKnews.kz.
Екі күнге созылған тартысты додаға Орал, Ақтөбе, Ақтау, Жаңаөзен және Атырау қалаларындағы әскери бөлімдерден жиналған 50-ге жуық спортшы қатысты.
Жарыс жоғары деңгейде ұйымдастырылып, қатысушылар өз шеберліктерін толық көрсете білді.
Жекпе-жектер кәсіби дайындық пен әскери рухтың жоғары екенін айғақтады. Алты команда арасынан озық шыққан жауынгерлер әр салмақ дәрежесі бойынша мықтыларды анықтап, жүлделі орындарды өзара бөлісті.
Жарыс қорытындысы бойынша жеңімпаз атанған спортшылар енді ҚР Ұлттық ұлан әскері бойынша өтетін чемпионатына жолдама алып, “Батыс” өңірлік қолбасшылығының намысын қорғайтын болады.
