«Даму» кәсіпкерлікті дамыту қоры Қазақстан Үкіметінің 2025 жылғы 2 маусымдағы қаулысымен Субсидиялау қағидаларының өзгерістері бекітілгенін хабарлайды, деп хабарлайды DKnews.kz.
Жаңа қағидалар Мемлекет басшысының нарықтық емес тетіктерден неғұрлым тұрақты шараларға - кепілдік беру мен жеңілдікті кредиттеуге кезең-кезеңімен көшуді қамтамасыз ете отырып, мемлекеттік қолдау шаралары жүйесін қайта қарау туралы тапсырмасына сәйкес қабылданды.
Негізгі өзгерістер:
• құны 200 млн теңгеден аспайтын микро және шағын кәсіпкерлік субъектілерінің кредиттері субсидиялауға жатады;
• субсидиялау мерзімі 3 жылға дейін;
• экономиканың басым салаларындағы жобалар үшін портфельдік субсидиялау тетігі енгізіледі:
1) өңдеу өнеркәсібі;
2) көлік және қоймалау;
3) туризм;
4) білім беру;
5) денсаулық сақтау;
• кредит бойынша ең жоғары мөлшерлеме - Ұлттық Банктің базалық мөлшерлемесі +4%. Қарыз алушыға түпкілікті мөлшерлеме 12,3% -дан, ал әлеуметтік кәсіпкерлер үшін 11,3% -дан;
• субсидия мөлшері - кредиттің жалпы мөлшерлемесінің 40%.
Несиенің максималды сомасын 200 млн теңгеге дейін қысқарту және мемлекеттік қолдау шараларын қайта қарау нәтижесінде субсидиялауға бюджет қаражаты шығынын 40% -ға дейін қысқарту күтілуде.
Сыйақы мөлшерлемесінің бір бөлігін жергілікті атқарушы органдар есебінен субсидиялау қосымша көзделген. Шарттары өңірлік әкімдіктердің келісімі бойынша анықталады, бұл жергілікті аймақтың басымдықтарын ескеруге мүмкіндік береді.
2020 жылдан бастап субсидияланатын жобалардың көлемі пандемия жағдайында ШОБ-ті қолдаудың дағдарысқа қарсы шаралары шеңберінде айтарлықтай ұлғайды - осы кезеңде бизнестің 103 мың жобасына қолдау көрсетілді.
