Астанада Орталық Азиядағы алғашқы Tier IV деңгейіндегі заманауи деректер орталығы салынады, деп хабарлайды DKnews.kz.
Бұл туралы AKASHI DATA CENTER компаниясының бас директоры Владислав Минкевич мәлімдеді.
Жобаны 2026 жылдың бірінші тоқсанында аяқтау жоспарланған. Жаңа деректер орталығы еліміздегі есептеу қуатының тапшылығын жойып, аса жоғары сенімділікті қамтамасыз етпек. Бұл орталықта 4000 серверлік сөре орнатылады — бұл Қазақстанның қазіргі қуатын екі есеге арттыруға мүмкіндік береді.
Владислав Минкевичтің айтуынша, 2024 жылдың соңында Қазақстанда шамамен 3800 серверлік сөре болған, олардың барлығы дерлік толы. Бұл жағдай цифрлық трансформацияны тежеп, жаңа компаниялардың нарыққа шығуына кедергі келтіруде.
Tier IV сертификаты — бұл ең жоғарғы сенімділік кепілі. Мұндай орталықтарда жылдық жұмыс істемей тұру уақыты 26 минуттан аспайды. Бұл қаржы, банк және мемлекеттік сектор үшін өте маңызды, себебі тіпті қысқа мерзімді үзілістердің өзі айтарлықтай экономикалық, беделдік немесе әкімшілік шығындарға әкелуі мүмкін.
Жаңа деректер орталығы Қазақстанның киберқауіпсіздігі мен цифрлық егемендігін нығайтып,
- деректерді ел ішінде сақтауға және өңдеуге,
- ұлттық киберқалқан жүйелерін енгізуге,
- сыртқы қауіптерді уақтылы анықтауға мүмкіндік береді.
Орталық Азиядағы алғашқы Tier IV деңгейіндегі дата-орталықтың құрылысы — бұл стратегиялық қадам. Жоба жаһандық технологиялық алыптарды тартуға, инновацияларды дамытуға жол ашады және Қазақстанның аймақтағы цифрлық экономиканың көшбасшысы ретіндегі орнын бекіте түседі.
«Еліміздегі деректер орталықтары Қазақстанда орналасқан деректердің сенімді қорғалуына мүмкіндік береді. Біз күнделікті қолданатын сайттар мен құжаттардан айырылып қалмас үшін, өзіміздің деректер инфрақұрылымымыз болуы аса маңызды. Геосаяси жағдайлар, санкциялар немесе үшінші тараптардың салдарынан болуы мүмкін үзілістер кезінде, бұл Қазақстанның киберсуверенитетіне еш әсер етпейді» Владислав Минкевич
Астананың бұл жоба үшін таңдалуы бекер емес. Қала — Astana Hub пен Астана халықаралық қаржы орталығының (АХҚО) жанында орналасқан, ал бұл өз кезегінде салықтық жеңілдіктер мен инновациялық орта ұсынады. Сонымен қатар, елорда — еліміздің ірі көлік-логистикалық хабы, бұл оны деректер орталығы үшін тиімді алаңға айналдырады.
Бұл жоба жаңа жұмыс орындарын ашып, шетелдік және отандық IT-компанияларды тартып, бизнеске жаңа мүмкіндіктер әкелетін экономикалық өсімнің катализаторына айналмақ.
