«Астана» халықаралық қаржы орталығы өз дамуында маңызды кезеңге жетті – тіркелген компаниялардың саны 4000-нан асты. 2025 жылдың басынан орталықтың тәуелсіз реттеушісі – Қаржылық қызметтерді реттеу комитеті (AFSA) 505 жаңа қатысушыны тіркеді, бұл 2024 жылдың ұқсас кезеңіндегі көрсеткіштен 12%-дан астам жоғары, деп хабарлайды DKnews.kz.
2015 жылы құрылып, 2018 жылы іске қосылған сәттен бастап АХҚО тұрақты өсім көрсетіп келеді. 1000 тіркелген компания межесіне үш жылдан аса қызметтен кейін - 2021 жылдың қыркүйегінде қол жеткізілсе, келесі екі жылда, яғни, 2023 жылдың шілдесінде 2000 компания, ал бір жылдан кейін, 2024 жылдың тамызында АХҚО юрисдикциясында 3000 компания тіркелді. Ал енді бір жылдан аз уақыт өткен соң – 2025 жылдың маусымында 4000 қатысушы белесі еңсерілді.
Жаңадан тіркелген компаниялардың көбі қаржы қызметтері, пайдалы қазбаларды барлау және өндіру, өнеркәсіптік өндіріс және сауда-саттық салаларында жұмыс істейді, бұл АХҚО-ның экономиканың әртүрлі салаларындағы бизнес үшін тартымдылығын растайды.
Жаңа қатысушылар қатарында – Ұлыбританияның жетекші зерттеу жоғары оқу орындарының беделді Russell Group құрамына кіретін әлемге әйгілі Кардифф университетінің еншілес құрылымы Cardiff University Kazakhstan Holdings Limited бар. 1884 жылы құрылған Кардифф университеті Ұлыбританияда түлектердің жұмысқа орналасу деңгейі бойынша 12-ші орында. Қазақстанда өкілдіктің ашылуы Мемлекет басшысының шетелдік университеттерді тарту жөніндегі стратегиялық бастамасына сәйкес келеді. Бұл жоба 2024 жылдың 14 тамызында Астанада әлемдік деңгейдегі ғылыми-зерттеу университетін құру бойынша Кардифф университетімен өзара түсіністік туралы меморандумға қол қойған ҚР Ғылым және жоғары білім министрлігінің қолдауымен жүзеге асырылуда.
АХҚО Басқарушысы Ренат Бектұров: «Біз көптеген компаниялардың «Астана» халықаралық қаржы орталығын жұмыс істеу және Қазақстанда бизнес жүргізу алаңы ретінде таңдап жатқанына қуаныштымыз. 4000 қатысушы компания межесін еңсеру географияның одан да ұлғаюын білдіреді, бұл аса қуантарлық жайт – АХҚО қаржы хабы ретінде өз миссиясын дәйекті түрде орындап келеді. Компаниялар санының көбеюі — бұл жергілікті мамандар үшін жаңа жұмыс орындарының ашылуы, салық түсімдерінің артуы және қосымша кәсіби тәжірибе ағыны».
АХҚО-да жақында тіркелген басқа да компаниялардың қатарында:
- Caspian Port Development Company Limited – Noatum Ports (AD Ports Group құрамына кіреді) және Semurg Holding B.V. (BVI) бірлескен кәсіпорны. Компания Құрық портындағы терминалдық инфрақұрылымды дамытумен айналысады. Жоба Қазақстан Республикасының 2030 жылға дейін Көлік-логистика әлеуетін дамыту концепциясы негізінде жүзеге асырылып отыр.
- Vishwa Samudra Hospitality Services (Kazakhstan) Ltd. – Сингапур, БАӘ, АҚШ және Германиядағы инфрақұрылым, логистика, теңіз тасымалы, жылжымайтын мүлік және т.б. салаларда жұмыс істейтін Vishwa Samudra үнді тобының еншілес құрылымы. Қазақстанда компания құрылыс жобаларын жүзеге асыруға баса назар аударады.
- Coteccons Construction KZ Ltd. – Оңтүстік-Шығыс Азиядағы ең ірі жеке құрылыс салушылардың бірі, вьетнамдық алпауыт Coteccons Construction JSC-тің 100% еншілес компаниясы. 800-ден астам жобаны сәтті аяқтаған және 2500 кәсіби маманнан тұратын командасы бар компания инжинирингтің жоғары стандарттарын енгізе отырып, Қазақстанның инфрақұрылымын дамытуға үлес қосуды жоспарлап отыр.
- Қазақстанның мәдени және креативті индустриялар қоры – мәдени және креативті жобаларды қолдау, дамыту және инвестиция салу үшін құрылған қайырымдылық ұйым. Қор қазақстандық мәдени мұраны және заманауи креативті индустрияны ілгерілетуді мақсат етіп отыр.
- Dodo Brands – Dodo Pizza және Drinkit желілерін басқаратын Еуропадағы ең ірі фуд-сервистердің бірі (топ-7-ге кіреді). Жақында компания Виргин аралдарынан АХҚО-ға редомициляция жасады. Әлемнің 26 елінде 1300-ден астам бөлімшесі ашылды, оның ішінде 100-ден астам пиццерия мен 14 кофехана Қазақстанда жұмыс істейді. Бұл шешім тез дамып келе жатқан және технологиялық бизнес үшін АХҚО-ның тартымдылығын көрсетеді.
Бүгінде АХҚО-да әлемнің 84 елінен келген компаниялар тіркелген. Компаниялар саны бойынша алғашқы ондыққа Қытай, Ресей, Ұлыбритания, АҚШ, Түркия, Сингапур, БАӘ, Үндістан, Кипр және Нидерланды кіреді. АХҚО қатысушылары реттелетін қаржы институттары, финтех-стартаптар, нарықтық инфрақұрылым провайдерлері, қосалқы қызметтер және басқа да бағыттар ретінде әртүрлі ұйымдық-құқықтық нысандарында жұмыс істейді.
