Kazakh Tourism мен Astana Concert Қазақстандағы event туризмді дамыту жолында байланыс көпірін нығайтады. Тараптар ынтымақтастық туралы меморандумға қол қойып, ауқымды іс-шаралар арқылы туристерді тартуды жоспарлап отыр. Биылдың өзінде Дженнифер Лопестің Қазақстандағы концерттеріне шетелден 18 мыңнан астам турист келеді деп күтілуде, деп хабарлайды DKnews.kz.
Фестиваль, концерт және халықаралық шоу-бағдарлама тәрізді ірі мәдени іс-шаралар халықаралық аудиторияны тартатын маңызды алаңға айналады. Екі компанияның синергиясы елдің туристік әлеуетіне деген тұрақты қызығушылықтың болуына септігін тигізеді.
«Біз Kazakh Tourism жанынан туроператорлардың қатысуымен арнайы штаб құрамыз. Ол Қазақстанда және шет елдерде әлемдік концерттерді ұйымдастыру мен ілгерілету мәселелерімен айналысады. Себебі әрбір ауқымды концерт немесе фестиваль – бұл мыңдаған қонақ. Бұл қонақ үйлер, қоғамдық тамақтану орындары, көлік сынды туристік инфрақұрылымның жүктелуін қамтамасыз етеді. Қолөнершілер өнімдеріне және жергілікті кәсіпкерлердің қызметтеріне де сұраныс артады. Мұның бәрі туристік ағынның артуына, инфрақұрылымның дамуына және жергілікті бюджетке түсетін кірістің өсуіне тікелей әсер етеді», – деді «Kazakh Tourism» ҰК» АҚ басқарма төрағасының міндетін атқарушы Даниел Сержанұлы.
Биыл Astana Concert Қазақстанның екі қаласында Дженнифер Лопестің ауқымды концертін ұйымдастырады. Бұл Орталық Азиядағы ең ауқымды музыкалық шаралардың біріне айналады деп күтілуде. Алдын ала мәлімет бойынша, елдің оңтүстік астанасына әлемнің 29 елінен көрермендер келеді.
«Біз әлемдік деңгейдегі оқиғалар әлемнің түкпір-түкпіріндегі туристердің қызығушылығын тудыратынын аңғардық. Дженнифер Лопестің концерті тәрізді алғашқы ауқымды шара Қазақстанды тек Орталық Азияда ғана емес, бүкіл ТМД кеңістігінде event-туризмнің орталығы ретінде таныстыру жолындағы маңызды қадам болатынына сенімдіміз», – деді компанияның продюсері Мәлік Хасенов.
