Қазақстандағы Солтүстік-Батыс политехникалық университетінің филиалы әлемдегі ең сұранысқа ие әрі болашағы зор бағыттардың бірі - «Жасанды интеллект» мамандығы бойынша жаңа бакалавриат бағдарламасының іске қосылғанын жариялады.
Бұл бағдарлама әл-Фараби атындағы Қазақ ұлттық университетімен серіктестікте жүзеге асырылады және студенттерге халықаралық деңгейдегі заманауи инженерлік білім алуға бірегей мүмкіндік ұсынады, деп хабарлайды DKnews.kz.
Солтүстік-Батыс политехникалық университеті - Қытайдың «А» санатындағы жетекші университеттерінің бірі. Ол елдің беделді мемлекеттік бастамалары — «211 жобасы» мен «985 жобасына» енген. Университет ғылыми-зерттеу деңгейінің жоғарылығымен, инженерлік дайындық сапасымен және инновациялық жобаларды сәтті жүзеге асыруымен танымал.
Оқыту сапасы, ғылыми базасы мен білім берудегі жаңашыл тәсілдерінің арқасында СБПУ инженерия және ақпараттық технологиялар саласындағы мойындалған көшбасшылар қатарында.
«СБПУ-мен бірлескен бағдарлама — бұл жай ғана жаңа білім беру курсы емес, Қазақстанда заманауи инженерлік білім беру орталығын қалыптастыруға бағытталған стратегиялық қадам. Біз бұл бағдарламаның түлектері цифрлық трансформацияның көшбасшыларына айналып, еліміздің ғылыми-техникалық дамуына үлкен үлес қосатынына сенеміз» Профессор Мадина Мансурова, PhD, әл-Фараби атындағы ҚазҰУ-дың Жасанды интеллект және Big Data кафедрасының меңгерушісі
Бағдарлама оқу барысында келесі негізгі тақырыптарды қамтиды: бейнелерді тану және машиналық оқыту, жасанды нейрондық желілер және олардың қолданылуы, компьютерлік көру, интеллектуалды жүйелер, статистикалық есептеу лингвистикасы, жасанды интеллектті кешенді жобалау. Студенттер ағылшын тілінде білім алып, халықаралық академиялық ортаға бейімделеді және жаһандық технологиялық индустрияда сұранысқа ие білімді меңгереді. Оқу процесіне теориялық курстармен қатар өндірістік серіктестердің қатысуымен өтетін практикалық жобалар да енгізілген.
Бағдарламаның басты артықшылықтарының бірі - қос диплом: түлектер Қытай және Қазақстан дипломдарын қатар алып, халықаралық еңбек нарығында өз мүмкіндіктерін едәуір кеңейтеді. Сонымен қатар, студенттер үшін Қытайдағы СБПУ кампусында бір жыл білім алу мүмкіндігі қарастырылған. Бұл олардың озық ғылыми ортаға енуіне жол ашады.
Абитуриенттер түрлі қаржылық қолдау түрлеріне үміткер бола алады: білім беру гранттары, академиялық стипендиялар мен жоғары жетістіктері бар студенттерге арналған ынталандыру бағдарламалары. Практикалық дағдыларға, ғылыми зерттеулерге және халықаралық оқыту стандарттарына ерекше назар аударудың арқасында бұл бағдарлама түлектері Huawei, Tencent, Alibaba, IBM және Microsoft сияқты жаһандық IT-компанияларда жұмыс істеу мүмкіндігіне ие болады.
«Қазақстанда жасанды интеллект бойынша бакалавриаттың ашылуы — ҚазҰУ-мен серіктестігіміздің маңызды кезеңі. Жаңа бағдарлама қазіргі еңбек нарығының сұранысына жауап береді және болашақ цифрлық көшбасшыларды даярлаудың берік негізіне айналады. Біз тек білім берумен шектелмей, болашақ технологияларын дамытатын инженерлер мен зерттеушілер буынын қалыптастыруға ұмтыламыз» Профессор Кун Цзе, Солтүстік-Батыс политехникалық университеті филиалының директоры
Жаңа бакалавриат бағдарламасынан бөлек, СБПУ филиалы материалтану, нанотехнологиялар, ақпараттық-коммуникациялық инженерия және компьютерлік ғылымдар салаларында қос дипломды магистратура бағдарламаларын да ұсынады. Бұл бағдарламалар ғылыми зерттеулер мен қолданбалы дағдыларға басымдық бере отырып, түлектерге жоғары технологиялық салаларда табысты мансап құруға жол ашады.
