«Таза Қазақстан»: Қарағанды қаласы Балқаш қаласынан цифрлық абаттандыру эстафетасын қабылдап, енді қаладағы өзгерістерді нақты уақыт режимінде көріп-бақылауға мүмкіндік алды, деп хабарлайды DKnews.kz.
Қала аумағында 25 медиаборд пен 5 LED-экран орнатылып, онда күнделікті абаттандыру және тазалық жайындағы ақпарат үздіксіз жаңартылып отырады. Сонымен қатар, апта бойғы статистика 53 қалалық қоғамдық көлік маршруты арқылы да тұрғындар назарына ұсынылады.
Экрандарда келесі көрсеткіштер көрсетіледі:
- шығарылған тұрмыстық қатты қалдықтар мен ірі көлемді қоқыстың мөлшері;
- қырқылған шөптің көлемі және тазаланған көшелердің аумағы;
- заңсыз қоқыс алаңдарының саны және олардың жойылуы.
Ақпарат коммуналдық және мердігер ұйымдардың жұмысына сүйене отырып, күн сайын жаңартылып отырады. Бұл — қаладағы ахуалдың ашық және объективті көрінісі. Тұрғындар қаладағы өзгерістерді тек сөз жүзінде емес, нақты статистикалық деректер арқылы бақылай алады. Сандық мәліметтер уәделерден әлдеқайда сенімді әрі айқын.
Мұндай ашықтық пен есептілік тәсілі қалалық қызметтердің жұмысының тиімділігін арттырып қана қоймай, тұрғындарды да тазалық пен тәртіпті сақтауға белсенді түрде араласуға ынталандырады. Өйткені нәтиже көзге көрініп тұрса, оның бір бөлшегі болуға деген ұмтылыс артады.
