Өңірде жидек пен бақша дақылдарын жинау маусымы жалғасуда. Қолайлы ауа райы мен фермерлердің тиімді агротехникалық тәсілдерінің арқасында облыс диқандары жоғары өнімділік көрсетіп отыр, деп хабарлайды DKNews.kz.
Облыстық ауыл шаруашылығы басқармасының мәліметінше, биылғы маусымда құлпынай үш ауданда 61 гектар алқапта өсірілген. Жалпы өнім көлемі 309 тоннаны құрады. Жинау көлемі бойынша көшбасшы — Еңбекшіқазақ ауданы (170 тонна), одан кейін Талғар (74 тонна) және Қарасай (65 тонна) аудандары. Орташа өнімділік — 50,7 центнер/гектарды құрады.
Бақша дақылдары бойынша да оң нәтижелер байқалуда. 700 гектар қарбыз алқабынан 15,7 мың тонна өнім жиналды. Әр гектардан фермерлер орта есеппен 234 центнер тәтті өнім алып отыр.
«Биыл фермерлер жоғары нәтиже көрсетті. Жергілікті өнімге сұраныс артып келеді. Біздің міндетіміз — нарықты жаңа піскен әрі сапалы жидек пен бақша өнімдерімен қамтамасыз ету», — деді Алматы облысы ауыл шаруашылығы басқармасының басшысы Ғалым Төкпеисов.
Агроөнеркәсіптік кешен өңір дамуының негізгі басымдықтарының бірі болып қала береді. Облыста мемлекеттік қолдау шаралары — субсидиялау, жеңілдетілген несиелеу, сондай-ақ инфрақұрылымдық жобалар жүзеге асырылып жатыр. Бұл шаралар ауыл шаруашылығын дамытуға және азық-түлік қауіпсіздігін арттыруға бағытталған.
