Абай ауданында инженерлік желілерді жаңарту қарқынды түрде жүзеге асырылуда, деп хабарлайды DKNews.kz.
Қаланың өзінде 26 км канализация желісін жаңарту жоспарланған. Қарағанды облысының әкімі Ермағанбет Бөлекпаев жұмыс сапары барысында құрылыс барысын көріп қайтты.
Абайдағы жобаны іске асыру былтыр басталған. Қазіргі таңда 6 км іргелес аумақтық кәріз желілері тартылып, жергілікті өндірушілердің құбырлары пайдаланылған.
Аудан тұрғындарын орталықтандырылған сумен қамтамасыз ету жұмыстары да жалғасуда.
Ягодное ауылында орталық сумен жабдықтау желісінің құрылысы аяқталуға жақын.
Жобаны іске қосқаннан кейін ауыл тұрғындарының 100%-ы сапалы ауыз сумен қамтылады.
3,2 км құбыр желілері тартылып, 42 құдық орнатылды, қазір іске қосу жұмыстары жүргізілуде. Сол сияқты, көршілес Садовое ауылында да ұқсас жоба жүзеге асырылуда.
— Биыл Абай ауданында Президент тапсырмасы бойынша ауыл тұрғындарын сапалы ауыз сумен 100%-ға қамтамасыз етеміз. Алыс елді мекендерге 5 су құбырлары бекеті орнатылды. Шамамен 200 адам тұратын екі ауылда сумен жабдықтау желілерін толық аяқтап жатырмыз. Қыркүйекте пайдалануға беру жоспарланған, — деді Абай ауданының әкімі Сәбит Оспанов.
Аудан бойынша алдағы жылу беру маусымына дайындық жұмыстары да жүргізілуде. Әкім «Бамовская» сорғы станциясын аралап, 78 көпқабатты тұрғын үй мен 17 әлеуметтік нысанға қызмет көрсететін станциядағы жөндеу жұмыстарымен танысты. Мұнда құрал-жабдықтар жаңартылып, магистральдық жылу желілері оқшауланған, жылу энергиясын есептейтін құрылғылар орнатылып, жылу желілері жөндеуден өткізілуде.
Сонымен қатар, Жартас ауылында қазандық құрылысы аяқталған, ал Южное кентінде модульді қазандық сатып алынған.
