2025 жылғы 28 тамызда Астанада шахматтан II «Senat Open» ашық кубогының финалы өтеді. 200-ден астам қатысушы жүлделерді сарапқа салады. Турнирге 17 облыс пен республикалық маңызы бар 3 қаланың шахматшылары, сондай-ақ Қазақстанның Парламент депутаттары қатысады. Жарыс жеке және командалық есепте өтеді, деп хабарлайды DKNews.kz.
Жарыс The Ritz-Carlton Astana қонақ үйінің бал залында өтеді, мекенжайы: Достық көшесі, 16. Турнир идеясын ҚР Парламенті Сенатының төрағасы Мәулен Әшімбаев ұсынған болатын. Ал Қазақстан шахмат федерациясының президенті Тимур Турлов бұл бастаманы қолдады. 2024 жылы рапидтен іріктеу турнирлеріне 2000-нан астам шахмат әуесқойы қатысты. 2025 жылы кубок екінші рет өткізіліп отыр. Оның сұлбасы үш кезеңді қамтиды. 21 ақпаннан бастап 27 мамырға дейін 20 іріктеу туры өтті. 25 маусымнан бастап 9 тамызға дейінгі аралықта Оңтүстік, Орталық, Солтүстік, Батыс және Шығыс аймақтары бойынша бес жартылай финал өтті. Финал циклді аяқтайды.
Іріктеу турларында 2100-ден астам шахматшы бақ сынасты. Ал ардагерлер турнирлерін есепке алғанда, қатысушылардың саны 3000-нан асты. Жартылай финалдар 25 маусымда Түркістанда («Оңтүстік» аймағы) басталды. Одан кейінгі турнирлер 29 маусымда Семейде («Орталық» аймағы), 4 шілдеде Көкшетауда («Солтүстік» аймағы), 23 шілдеде Оралда («Батыс» аймағы) және 9 тамызда Талдықорғанда («Шығыс» аймағы) өтті.
Аккредиттеу сағат 9:00-де басталады. Ашылу рәсімі сағат 10:00-де өтеді. Жабылу салтанаты сағат 19:00-ге жоспарланған. Турнир аясында швейцариялық жүйе бойынша 9 тур өткізіледі. Уақыт бақылау нұсқасы — рапид 10+5 (партияға 10 минут беріледі және әр жүріс үшін 5 секунд қосылады). 2025 жылғы 1 қаңтардағы жағдай бойынша қатысушылардың Эло рейтингі 2000-нан төмен.
2024 жылы жеке есепте Қайрат Құрманғалиев (Астана), Сұлтан Садықов (Шымкент) және Алмас Сармырзаев (Ұлытау облысы) жеңімпаз атанды. Астана командасы ауыспалы кубокты жеңіп алды.
«Senat Open» финалында Қазақстанның ең мықты шахматшылары бас қосады. Турнир шахматқа деген қызығушылықты нығайтады. Оның аясында көрермендер тамаша жарыстардың куәсі болады.
