Ел Конституциясының қабылданғанына 30 жыл толуына орай және «Таза Қазақстан» республикалық экологиялық акциясы аясында елордада сенбілік өтті, деп хабарлайды DKNews.kz.
«Жасыл Ел» жастар еңбек жасағының 150-ден астам жауынгері Конституция көшесі бойындағы аумақты қоқыстан тазартып, ретке келтірді, деп хабарлайды қала әкімдігінің ресми сайты.
Іс-шара елордалық Жастар саясаты мәселелері басқармасы мен Сарыарқа ауданы әкімдігінің қолдауымен ұйымдастырылды.
Ұйымдастырушылардың айтуынша, акция символдық мәнге ие болды. Конституция – мемлекетіміздің негізі, ал жастардың қаланы тазалық ісіне қатысуы – елге және оның заңдарына деген құрметтің көрінісі.
«Экологиялық мәдениет – бұл тек айналамыздың тазалығы ғана емес, әрбір азаматтың елінің болашағына деген жауапкершілігі. Жастар табиғатты қорғау мен мемлекеттік рәміздерге құрмет көрсету ісінде алдыңғы қатарда болуы тиіс. Бүгін біз қоршаған ортаға қамқорлық – Тәуелсіз Қазақстанды дамытуға қосқан үлесіміз екенін көрсеттік», – деді «Жасыл Ел» жобасы басшысының орынбасары Асылбек Абдурашитов.
Іс-шараның негізгі міндеттері – Конституцияға құрмет сезімін тәрбиелеу, экологиялық мәдениетті қалыптастыру, жастар арасында патриоттық рух пен азаматтық жауапкершілікті арттыру.
