Қазақстанда мемлекет ресурстарын пайдалану бойынша көпдеңгейлі бақылау жүйесі жұмыс істейді – сыртқы және ішкі аудит, деп хабарлайды DKNews.kz.
Сыртқы мемлекеттік аудит – бұл «сырттан» жүргізілетін тәуелсіз тексеріс. Оны мына органдар жүзеге асырады:
- Жоғары аудиторлық палата (мемлекеттік аудит пен қаржылық бақылаудың жоғарғы органы);
- тексеру комиссиялары (облыстарда, ірі қалаларда және елордада жұмыс істейді).
Бұл органдар ұлттық ресурстарды, яғни бюджет қаражатын, табиғи байлықтарды, мемлекет мүлкін пайдалану заңдылығы мен тиімділігін бағалайды.
Ішкі мемлекеттік аудит – бұл «іштен» бақылау. Оған мына органдар жауап береді:
- Қаржы министрлігінің құрамындағы Ішкі мемлекеттік аудит комитеті;
- министрліктердегі, ведомстволардағы және жекелеген мемлекеттік органдардағы ішкі аудит қызметтері.
Олар стратегиялық құжаттарда белгіленген мақсаттарға қол жеткізуді, қаржылық есептіліктің дұрыстығын, ішкі процестердің тиімділігін, мемлекеттік қызметтердің сапасын және мемлекет мүлкінің сақталуын талдайды.
Осылайша сыртқы мемлекеттік аудит бүкіл ел деңгейінде мемлекет шығыстарын бағаласа, ішкі аудит нақты ведомстволар мен ұйымдардың жұмысын тексереді.
Мұндай жүйе сыбайлас жемқорлық тәуекелдерін төмендетеді, ашықтықты арттырады және заңбұзушылықтарды дер кезінде анықтап, олардың алдын алуға мүмкіндік береді.
