Қазақстан Республикасы Конституциясының 30 жылдығына арналған пошта маркасына салтанатты түрде мөр басылды, деп хабарлайды DKNews.kz.
Тәуелсіздік сарайында Қазақстан Республикасы Конституциясының 30 жылдығына арналған естелік пошта блогын салтанатты түрде айналымға енгізу рәсімі өтті.
«Қазпошта» АҚ Басқарма төрағасы Бекежан Жәкеев пен Қазақстан Республикасы Конституциялық Сотының төрағасы Эльвира Әзімова арнайы пошта мөртабанымен маркаға естелік мөр басу рәсімін жасады.
Жаңа шығарылым алты маркалы пошта блогынан тұрады. Номиналы – 500 теңге. Таралымы – 3 000 дана. Дизайнын суретші Әсел Сибағатова әзірледі. Қазақстан Республикасы Ұлттық Банкінің Банкнот фабрикасында басып шығарылды.
«Пошта маркасы – Қазақстанның бейнесін әлемге паш ететін елдің визит карточкасы. Біз филателияда Конституцияның мерейтойын мәңгі есте қалдыра алғанымызды мақтан тұтамыз. Бұл шығарылым коллекционерлер үшін құнды экспонат және тарихымыздың айшығы болады» «Қазпошта» АҚ Басқарма төрағасы Бекежан Жәкеев
ҚР Конституциялық Сотының төрағасы Эльвира Әзімова іс-шараның маңыздылығын атап өтті:
«Конституция – мемлекетіміздің іргетасы, тәуелсіздіктің, әрбір азаматтың құқықтары мен бостандықтарының белгісі. Конституцияның 30 жылдығына орай пошта маркасын шығару – тарихқа құрмет көрсетудің белгісі және болашақ ұрпақтың жадында сақтауға қосқан үлес»
«Қазпошта» АҚ дәстүрлі түрде елдің өміріндегі маңызды оқиғаларға арналған пошта маркаларын шығарып, ұлттық бірегейлікті нығайтып, Қазақстанның мәдени мұрасын насихаттап келеді.
