Қазақстан Республикасы Конституциясының 30 жылдығына арналған халықаралық конференция аясында «Конституциялық теңдік кепілдіктері, қорғау құқығы және әділеттілікке қол жеткізу» тақырыбындағы сессияға ҚР Парламенті Сенаты Төрағасының орынбасары Жақып Асанов қатысты, деп хабарлайды DKNews.kz.
Сөз басында Сенат Вице-Спикері Қазақстан Конституциясы үш онжылдық ішінде мемлекеттің берік іргетасына және адам құқықтарын қорғаудың басты кепіліне айналғанын атап өтті. Ол құқық үстемдігін нығайтуға, сот әділдігіне деген сенімді арттыруға бағытталған прокуратура мен сот жүйесіндегі реформалардың маңыздылығына ерекше тоқталды.
«30 жыл ішінде Конституция елмен бірге дамып, заман талабына сай бейімделіп отырды және адам құқықтарын қорғауда сенімді тірек болып қала берді. Біздің тәжірибе көрсетіп отырғандай, Конституциядағы құндылықтар мен қағидаттарға сүйену адам құқықтарын нақты қорғауға жол ашады. Мәселен, 2017 жылы прокуратураға қатысты бап жаңартылып, қылмыстық қудалау саласындағы айрықша құзырет бекітілді және сотқа дейінгі процестің ашықтығы қамтамасыз етілді. Цифрландыру мен «Электронды қылмыстық іс» жүйесін енгізудің нәтижесінде қылмыстық істердің саны үш есеге қысқарып, жүздеген мың азамат негізсіз қылмыстық процесске тартылудан қорғалды. Бүгінде Қазақстанның бұл тәжірибесі халықаралық деңгейде мойындалып отыр. Сот және прокуратура саласындағы реформалар шетелдік сарапшылар тарапынан жоғары бағаланды, ал еліміздің әділет моделі ірі халықаралық конференцияларда кеңінен талқылануда», - деді Жақып Асанов.
Конференция барысында қатысушылар конституциялық институттардың дамуын, теңдік пен әділеттілікке қол жеткізу кепілдіктерін, сот жүйесіндегі реформалар мен олардың азаматтардың құқықтарын қорғаудағы нақты нәтижелерін талқылады. Сондай-ақ сот билігінің тәуелсіздігі, қылмыстық процесті цифрландыру және қазіргі заманғы сот өндірісі модельдерін енгізу мәселелеріне ерекше назар аударылды.
