Елордада Конституция күніне орай қалалық Жастар саясаты мәселелері басқармасының қолдауымен «Жас Сарбаз» жасөспірімдер әскери-патриоттық қозғалысы» республикалық қоғамдық бірлестігі Астана қалалық филиалының ұйымдастыруымен ҚР Ұлттық музейінде жас патриоттарға арнап экскурсия өткізді, деп хабарлайды елорда әкімдігінің ресми сайты.
Іс шараның мақсаты – өскелең ұрпақ арасында патриотизмді, мемлекетке деген құрмет пен сүйіспеншілікті қалыптастыру, Конституцияның маңызын түсіндіру, ел тәуелсіздігі мен ұлттық бірліктің құндылығын дәріптеу, деп хабарлайды DKNews.kz.
Сонымен қатар, өскелең жастардың құқықтық мәдениетін арттыруға, азаматтық жауапкершілігін нығайтуға және тарихи-мәдени мұраға деген қызығушылығын дамытуға бағытталған.
Экскурсияға «Жас Сарбаз» қозғалысының 25 тәрбиеленушісі қатысты.
Атап өту керек, Астана қаласында қазіргі уақытта 10 мыңға жуық жас сарбаз тәрбиеленушісі бар.
«Бүгін қатысушыларға ҚР Конституциясының шығу тарихын таныстырып, оның маңыздылығын атап өтіп жатырмыз. Бауыржан Момышұлы атамыздың «Тәртіпке бағынған құл болмайды тәртіпсіз ел болмайды» деген керемет сөзі бар. Әрбір мемлекеттің тұрақты әрі дәйекті дамуы үшін мемлекеттің Ата заңы, тәртібі болуы керек. Сол себепті бүгінгі өтіп жатқан іс-шараның мән-маңызы орасан зор деп атап өткім келеді. Біз мұнымен ғана шектелмейміз, Ата заңымыз – Конституцияның әзірленуіне атсалысқан арнайы тұлғалар, азаматтар мен азаматшалар бар. Сол кісілермен байланысқа шығып, олардың қатысуымен арнайы «Жас сарбаз» тәрбиеленушілеріне адам құқығы бойынша сабақтар өткізу және оның тарихына тереңінен үңілу мақсатында арнайы іс-шаралар өтетін болады.
Мемлекет басшысы айтып өткендей, Ата заң – ол мемлекетіміздің берік тұғыры, еліміздің тұрақты әрі дәйекті даму кепілі. Сондай-ақ, елтаңбамыз, рәміздер күні де іс-шаралар, одан бөлек, ұлттық әскери-патриоттық орталықтарда арнайы ашық есік күндері өтеді», – дейді «Жас Сарбаз» жасөспірімдер әскери-патриоттық қозғалысы Астана қалалық филиалының төрағасы Асхат Налшыбек.
Ол сөзін жалғай отырып, жастардың бойында ұлттық тәрбиені, ұлттық рухты, патриоттық сезімді қалыптастыру, жастардың тарихқа зер салуына мән беру – «Жас сарбаз» қозғалысының басты мақсаты. Себебі тарихты білмесе, болашаққа қол соза алмаймыз.
«Сондықтан біздің алғашқы іс-шарамыз ұлттық музейден басталып отыр. Бізде арнайы кесте бар. Астана қаласында орналасқан Ұлттық музей, Ұлттық әскери-патриоттық орталық, Тұңғыш Президент атындағы кітапхана, АЛЖИР бар. Жалпы, Астана қаласындағы тарихи орындар жеткілікті. Ашық есік күндерін ұйымдастыру мақсатында әрбір мектепке біз арнайы кесте құрамыз, жастар түске дейін немесе түстен кейін сабақтан тыс бос уақытында сол жерлерге келіп, өздеріне керекті ақпараттарды алатын болады», – дейді Асхат Налшыбек.
