Бүгін Алматы халықаралық әуежайында «Тәтті кәдесый сыйлыққа» акциясы басталды, деп хабарлайды DKNews.kz.
Конституция күні қалаға келген шетелдік қонақтарға паспорттық бақылау мен кеден аймақтарында естелік сыйлықтар ұсынылды. Қонақтарға паспорт қаптамасы, печенье және қазақстандық шоколад сыйға тартылды.
Акцияны Алматы қаласы Туризм басқармасы әуежай, шекара қызметі және «Жетісу» кеден бекетімен бірлесіп ұйымдастырды. Негізгі мақсат – туристерге мерекелік көңіл-күй сыйлап, қазақ халқының қонақжайлығын көрсету. Бүгін шамамен 10 мың жолаушы осындай сыйлық алады.
Әуежай терминалында Конституция күніне арналған мерекелік фотоаймақ жұмыс істейді. Әрбір қонақ дәстүрлі қазақ шапанын киіп, естелікке суретке түсе алады.
Жолаушылар бұл сыйды қуанышпен қабылдап, әсерлерімен бөлісуде. Олар Алматының жылы шырайлы қонақжайлығын ерекше атап өтуде. Көпшілігі үшін бұл қаламен алғашқы жарқын танысуға айналды.
Алматы еліміздің басты туристік орталығы ретіндегі мәртебесін сақтап келеді: Қазақстанға келген шетелдік қонақтардың жартысынан астамы – 52,3%-ы дәл осы қалаға ат басын бұрады. Қаланың ерекше мәдениеті, бай тарихы мен табиғаты туристерді қайта-қайта оралуға шақырады.
