Атырау қаласындағы Ақсай атшабарында ҚР Конституциясының 30 жылдығына арналған республикалық ат бәйгесі өтті, деп хабарлайды DKNews.kz.
Жарысты Атырау облыстық дене шынықтыру, спорт және туризм басқармасының қолдауымен «Бәйге» федерациясы ұйымдастырды, - деп хабарлайды Өңірлік коммуникациялар қызметі.
Жарысқа еліміздің бірнеше өңірінен 120-дан астам жүйрік қосылып, 1500-ге жуық көрермен ұлттық спорттың тартысты сәттерін тамашалады. Бағдарламада тай жарыс (6 шақырым), құнан жарыс (9 шақырым), топ бәйге (18 шақырым) және аламан бәйге (24 шақырым) қашықтықтары қамтылды.
Бұл бәйге – ұлттық спортты дәріптеу мен жастарды отансүйгіштікке тәрбиелеуге бағытталған маңызды шара. Конституцияның 30 жылдығы аясында ұйымдастырылып отырған ат жарысы ел бірлігін нығайтып, салт-дәстүрімізді дәріптеуге үлкен үлес қосып отыр, – деді Атырау облыстық дене шынықтыру, спорт және туризм басқармасының басшысы Нұрбол Сыдықов
Жарыс қорытындысында әр санат бойынша жеңімпаздар анықталды. Тай жарыста Батыс Қазақстан облысынан келген «Медина» жүйрігі бірінші орынды иеленді. Құнан жарыста Ақжайықтық «Бөрте» сәйгүлігі топ жарса, екінші орынды Атыраудан қосылған «Қызқұйрық» иеленді. Топ бәйгеде Маңғыстау облысының «Сархан» аты алдына жан салмай, жеңімпаз атанды. Ал аламан бәйгеде 24 шақырымды ең қысқа уақытта жүгіріп өткен «Ақбаян» жүйрігі мәреге бірінші болып келді.
Бұл жеңіс мен үшін ерекше қуаныш. Ат спортымен айналысып келе жатқаныма 3 жылға жуық уақыт болды. Бәйгеге шығарған «Сархан» атты жүйрігіміз Ресейден келген ат. Ұлттық спортқа деген қызығушылықтың жоғары екенін көріп, шабыттанамыз. Көрермендердің қолдауы бізге ерекше күш берді, – деді топ бәйгенің жеңімпазы Насихат Абдулла
Атбегілердің айтуынша, әрбір жеңіс артында үлкен еңбек пен жүйелі дайындық жатыр.
Жүйрікті баптау – табандылық пен төзімділікті талап етеді. Әр жарыс – тәжірибе, әр бәйге – шыңдалу. Бүгінгі жеңіс бүкіл команда еңбегінің жемісі, – деді «Сархан» жүйрігінің бапкері Сәрсенбек Орынбаев
Бәйге жеңімпаздарына берілген жүлде қоры 10 миллион теңгеге жуық. Аламан бәйгенің үздігі 1 миллион 800 мың теңге, топ бәйгенің жеңімпазы 1 миллион 200 мың теңге иеленді. Қалған санаттарда да үздік шыққандар лайықты марапатталып, қаржылай сыйлықтарға қол жеткізді.
Ұйымдастырушылардың айтуынша, ұлттық спортты дәріптейтін мұндай жарыстар алдағы уақытта да дәстүрлі түрде жалғасын таппақ.
