ҚР Өнеркәсіп және құрылыс министрлігі үлескерлердің құқықтарын қорғау мақсатында үлескерлік құрылыс туралы заңға өзгерістер енгізді. Мұндай шара құрылыс салушылардың жосықсыз тәжірибесін, реттеудің жеткіліксіздігін және өңірлік құрылыс салушылардың заңды үлескерлік нарыққа қатысуы үшін жоғары кедергілердің болуын ескере отырып қабылданды. Бұл туралы ОКҚ алаңында өткен баспасөз конференциясында ҚР ӨҚМ Құрылыс және ТКШ істері комитетінің төрағасы Бақытжан Жүнісбеков мәлімдеді, деп хабарлайды DKNews.kz.
Спикер Бірыңғай оператордың кепілдік беру тетігін егжей-тегжейлі түсіндірді. Алдымен құрылыс салушы және уәкілетті компания қажетті құжаттар пакетін қоса бере отырып, кепілдік алуға өтініммен «Қазақстандық тұрғын үй компаниясы» АҚ-на жүгінеді. Содан кейін «ҚТК» АҚ техникалық-экономикалық, қаржылық және заң сараптамасын, сондай-ақ тәуекелдер мен қаржыландыру құрылымын талдауды қамтитын жобаны кешенді бағалауды жүргізеді. Кепілдік беру туралы шартқа қол қойылғанға дейін уәкілетті компания бас мердігермен шарт жасасуға және «ҚТК» АҚ және инжинирингтік ұйыммен үшжақты шартқа қол қоюға міндетті.
«Барлық алдын ала рәсімдер аяқталғаннан кейін «ҚТК» АҚ мен уәкілетті компания арасында кепілдік беру туралы шарт жасалады, онда тараптардың міндеттемелері мен кепілдік жағдайын тану шарттары бекітіледі. Бірыңғай оператордың кепілдігі үлескерге салынып жатқан тұрғын үйге қосымша кепіл бермей ипотекалық қарыз ресімдеуге, сондай-ақ «Otbasy Bank» жүйесінің құралдары арқылы зейнетақы жинақтарын пайдалануға мүмкіндік береді. Осылайша, кепілдік тетігі үлескерлерді сенімді құқықтық қорғауды, құрылысты қаржыландырудың ашықтығын және құрылыс салушының қаржылық тәуекелдері туындаған жағдайда жобаның аяқталуын қамтамасыз етеді», – деді Бақытжан Жүнісбеков.
Өнеркәсіп министрлігі енді заң бойынша екінші деңгейлі банктердің жобаға қатысу талаптары тәжірибе бойынша 3 жылдан 2 жылға дейін, көлемі бойынша республикалық маңызы бар қалалар мен астанада 18 мың шаршы метрден 10 мың шаршы метрге дейін және өңірлерде 9 мың шаршы метрден 5 мың шаршы метрге дейін төмендейтінін түсіндірді. Кредиттік шарт жасау, жобалау-сметалық құжаттамада көзделген сомаға кредиттік берешектің болуы туралы анықтама Екінші деңгейлі банктердің көппәтерлі тұрғын үйді қаржыландыруға әзірлігін растау болып табылады.
Бұдан бөлек, көппәтерлі тұрғын үйдің қаңқасы құрылысының аяқталуын күтпей, үлескерлердің ақшасын тартуға ЖАО рұқсатын алғаннан кейін бірден үлескерлердің ақшасын пайдалануға жол беріледі. Сонымен қатар заңға сәйкес үйдің қаңқасы салынғаннан кейін қатысу талаптары азаяды. Мәселен, тәжірибе 5 жылдан 3 жылға дейін, көлемі республикалық маңызы бар қалалар мен Астанада 60 мың шаршы метрден 36 мың шаршы метрге дейін және өңірлерде 30 мың шаршы метрден 18 мың шаршы метрге дейін төмендеді.
