Қытай қарқынды дамып келе жатқан гуманоид роботтар индустриясы үшін ұлттық цифрлық сәйкестендіру жүйесін іске қосты. Енді әрбір роботқа оның шығу тегі мен бүкіл өмірлік циклін бақылауға мүмкіндік беретін 29 таңбалы бірегей сәйкестендіру коды беріледі.
Бұл бастама саланың қауіпсіздігін қамтамасыз етуге, жауапкершілік жүйесін күшейтуге және бірыңғай стандартталған басқару тетігін қалыптастыруға бағытталған. Жоба аясында Бейжіңде гуманоид роботтардың толық өмірлік циклін басқаруға арналған ұлттық сервистік платформа да іске қосылды.
ҚХР Өнеркәсіп және ақпараттық технологиялар министрлігі жанындағы Стандарттау комитеті жетекшілік ететін жаңа платформа әрбір гуманоид роботқа міндетті түрде бірегей сәйкестендіру кодын тағайындауды көздейтін нормативтік жүйенің негізгі операциялық базасына айналды.
Ұлттық стандарттау органдары әзірлеген цифрлық идентификатор роботтың өзіндік «цифрлық паспорты» қызметін атқарады. Ол өндіріс, сату, пайдалану, техникалық қызмет көрсету және кәдеге жарату кезеңдерін қоса алғанда, роботтың бүкіл өмірлік циклін толық қадағалауға мүмкіндік береді.
29 таңбалы код төрт бөліктен тұрады: екі таңбалы ел коды, төрт таңбалы кәсіпорын коды, алты таңбалы өнім моделі коды және 17 таңбалы сериялық нөмір. Мұндай құрылым әрбір роботты нақты сәйкестендіріп, оның қозғалысын бақылауға жағдай жасайды.
Қытай электротехникалық стандарттау институты вице-президенті Юй Сюминнің айтуынша, бірегей кодтарды енгізу роботтардың барлық салалардағы қолданылуын тиімді бақылауға мүмкіндік береді. Оның пікірінше, бұл қауіпсіздік, басқару және реттеу мәселелерін шешіп, гуманоид роботтарды практикалық қолдануды жеделдетеді.
Жаңа жүйе Қытайдағы гуманоид роботтар индустриясының қарқынды дамуы жағдайында енгізіліп отыр. 2025 жылы елдегі робот жеткізілімдерінің көлемі әлемдік нарықтағы жетекші үлесті иеленді. Қазіргі таңда Қытайдың өнеркәсіптік кластерлерінде осы саладағы 500-ден астам негізгі кәсіпорын жұмыс істейді.
Сонымен қатар, нарықтың жылдам өсуі кодтау жүйелерінің әркелкілігі мен жауапкершіліктің нақты бөлінбеуі сияқты мәселелерді де туындатқан болатын. Осыған байланысты жаңа стандарт «код жоқ болса — нарыққа шығуға болмайды» қағидатын бекітті.
Енді ішкі нарықта сатылатын немесе пайдаланылатын барлық гуманоид роботтар міндетті түрде тіркеуден өтуі тиіс. Өндірушілер анықталған ақаулар болған жағдайда өнімді жедел кері қайтарып алуға міндеттеледі, ал істен шыққан роботтарды қайта құрастырып сату қатаң түрде тыйым салынады.
Өнеркәсіп және ақпараттық технологиялар министрлігінің өкілдері жаңа платформа ғылыми-зерттеу жұмыстары, өндіріс, техникалық қызмет көрсету және кәдеге жарату кезеңдерін қамтитын тұйық циклді басқару жүйесін қалыптастыратынын атап өтті. Бұл тәуекелдерді алдын ала анықтап, жауапкершілікті нақты белгілеуге мүмкіндік береді.
Платформа іске қосылғалы бері оған Қытайдың 100-ден астам компаниясы қосылып, 200 түрлі модельге жататын 28 мыңнан астам роботқа толық өмірлік цикл кодтары берілген.
Юй Сюминнің айтуынша, қытайлық гуманоид роботтардың халықаралық нарықтарға сапалы шығуын қамтамасыз ету үшін бірыңғай стандарттарға негізделген басқару жүйесін қалыптастыру аса маңызды. Оның пікірінше, бұл жүйе халықаралық өзара мойындау мен трансшекаралық айналымға техникалық негіз жасап қана қоймай, Қытайдың жаһандық стандарттарды қалыптастырудағы рөлін күшейтіп, елдің осы саладағы бәсекеге қабілеттілігін арттырады.
