Елімізде Балалардың әл-ауқаты индексінің қорытындылары аясында ауқымды әлеуметтік зерттеу жүргізілді.
Сауалнамаға балалар, ата-аналар және педагогтер қатысты, деп хабарлайды DKNews.kz.
Зерттеу нәтижелеріне сәйкес, балалардың құқықтық қорғалуының орташа деңгейі 90,3%-ды құрады. Бұл олардың өз құқықтары туралы хабардарлығы жоғары екенін және өздерін қорғау тетіктерін қолдана алатынын көрсетеді.
Алдыңғы қатардан Қостанай облысы (94,5%), Маңғыстау облысы (93,5%) және Қызылорда облысы (93,1%) көрінді.
Маңызды көрсеткіштердің бірі – жасөспірімдердің өз өміріне қанағаттану деңгейі. Орта есеппен 10–18 жастағы балалардың 85%-ы өзінің әлеуметтік және психологиялық жағдайын оң бағалаған. Бұл бағытта ең жоғары нәтиже Қостанай облысында (90,1%), Шымкент қаласында (88,7%) және Қызылорда облысында (88,5%) тіркелді.
Зерттеу барысында отбасы ішіндегі сенім деңгейіне ерекше көңіл бөлінді. Нәтижесінде жасөспірімдердің 90,4%-ы ата-анасымен ашық сөйлесіп, ой-пікірін бөлісе алатынын көрсетті. Ең жоғары көрсеткіштер Ұлытау облысында (97,5%), Астана қаласында (95,3%) және Қостанай облысында (94,7%) байқалды.
«Балалар әл-ауқаты индексі – баланың денсаулығы, білімі, отбасы және әлеуметтік ортасын қамтитын маңызды көрсеткіш. Біздің мақсатымыз – ең алдымен балалардың өз үнін есту. Зерттеу нәтижелері олардың өздерін қауіпсіз сезінетінін, ата-анасымен жақсы қарым-қатынасын және болашағына сеніммен қарайтынын көрсетіп отыр» ҚР Оқу-ағарту министрлігі Балалардың құқықтарын қорғау комитетінің төрайымы Насымжан Оспанова
Айта кетейік, 2024 жылдың қорытындысы бойынша Қазақстанда Балалардың әл-ауқаты индексі тұрақты өсім көрсетіп, орташа республикалық көрсеткіш 2,5 пунктке артып, 58,6 балды құрады.
