Ақмола облысы еліміздің өнеркәсіптік әрі инвестициялық орталықтарының біріне айналып келеді. Өңір экономикасы жаңа өндірістердің ашылуы, капитал ағыны және шағын бизнестің белсенді дамуы есебінен өсіп отыр, деп хабарлайды DKNews.kz.
Тек сегіз айдың ішінде 456 млрд теңге инвестиция тартылды, бұл өткен жылдың сәйкес кезеңімен салыстырғанда бір жарым есе артық.
«Целиноград ауданында алюминий прокатын өндіретін зауыт іске қосылуда, Көкшетауда жарма зауыты салынып жатыр, Қазақстан Аграрлық Инновациялық Корпорациясының қуаттылығы кеңейтілуде. Облыс орталығында заманауи сауда кешендері пайда болуда. Биыл өңірде жалпы сомасы 248 млрд теңгеге 226 жоба жүзеге асырылып жатыр, олар 2,5 мың жаңа жұмыс орнын ашпақ», – деді кәсіпкерлік басқармасының басшысы Бақытжан Сапар.
«AQMOLA» алаңында бір триллион теңгеден асатын инвестициялық портфель қалыптасуда, ол бес мың тұрақты жұмыс орнын құруға мүмкіндік береді. Мұнда астықты терең өңдеу, тыңайтқыштар, құрылыс материалдары және ауыл шаруашылығы техникасын өндіру жобалары дамып келеді. Мұндай тәсіл тек шикізат өсірумен шектелмей, оны жоғары қосылған құнға ие өнімге айналдыруға жол ашады.
Өңір экономикасының негізгі саласы – өнеркәсіп.
«Қаңтар–тамыз айларында кәсіпорындар 1,6 трлн теңгенің өнімін шығарды, оның 80 пайыздан астамы өңдеу секторына тиесілі. Машина жасау саласында өсім 24,4%-ды, трактор өндірісінде – 36,7%-ды, пестицидтерде – 42,9%-ды құрады. Алдыңғы қатарлы кәсіпорындар қатарында «КАМАЗ-Инжиниринг», «Altyntau Kokshetau», «Алтыналмас», Степногорск подшипник зауыты, Макинск құс фабрикасы және «Көкшетауминводы» бар», – деді Бақытжан Сапаров.
Сонымен бірге ірі индустриялық жобалар жүзеге асырылуда: Степногорск тау-кен химия комбинатының кеңейтілуі, Шортанды ауданында жаңа кірпіш зауыттарының салынуы, КАИК пен KazRost Engineering қуаттарының жаңғыртылуы.
Маңызды фактордың бірі – шағын және орта бизнес. Бұл салада 140 мыңнан астам адам еңбек етуде, ол – экономикалық белсенді халықтың үштен бірі.
«Өңірде 62 мыңнан астам ШОБ субъектісі жұмыс істейді. Олар сегіз айдың ішінде 456 млрд теңгенің өнімін өндіріп, 127 млрд теңге салық төледі. ШОБ-тың жалпы өңірлік өнімдегі үлесі өткен жылғы 27,7%-дан 30,1%-ға жетті», – деп бөлісті ведомство өкілі.
Мемлекеттік қолдау жыл сайын ондаған жобаны жүзеге асыруға мүмкіндік беруде. Биыл жалпы сомасы 8 млрд теңгеге 71 кәсіпкерлік жобаға көмек көрсетілді. Әлеуметтік кәсіпкерлік те дамып келеді: мүмкіндігі шектеулі жандарға қызмет көрсету орталықтары, ерекше қажеттіліктері бар балаларға арналған түзету мекемелері, ауылдық округтердегі бастамалар қолдау тапты.
