Елордада ерлер мен әйелдер арасында өтетін қоян-қолтық ұрысынан әлем кубогының финалы басталды. Турнир Қазақстан Республикасы Төтенше жағдайлар министрлігінің 30 жылдығына арналған, деп хабарлайды DKNews.kz.
Бүгін турнирдің алғашқы күні өтті – мандаттық комиссия, салмақ өлшеу, жеребе тарту және брифинг ұйымдастырылды. Брифинг барысында жарыстың ережелері мен өткізу тәртібі талқыланды.
Турнир Жақсылық Үшкемпіров атындағы жекпе-жек сарайында екі бағытта өтеді: өзін-өзі қорғау және жекпе-жек. Байрақты додаға әлемнің 13 елінен келген 200-ден астам спортшы қатысуда. Олар халықаралық аренада өз шеберлігін, рухын және ерік-жігерін көрсетеді.
Қатысушы елдер: Қазақстан, Ресей, Ауғанстан, Иордания, Үндістан, Пәкістан, Өзбекстан, Беларусь, Тәжікстан, Әзербайжан, Армения, Қырғызстан, Моңғолия.
Финалдық кезең Қазақстан Республикасының Төтенше жағдайлар министрлігі, «Batyr Team» спорт клубы, Қоян-қолтық ұрысынан халықаралық және бүкілқазақстандық федерациясы қолдауымен ұйымдастырылды, ал бас демеушісі Қазақстан Құтқарушылары қоры.
Алдағы екі күнде спортшыларды қызықты да тартысты жекпе-жектер күтіп тұр!
