ТЖМ құтқарушылары жасөспірімге шұғыл көмек көрсетті, деп хабарлайды DKNews.kz.
Бүгін Қарағанды облысының Теміртау қаласында, «Тас карьер» учаскесінде, ТЖМ құтқарушылары мен жедел жәрдем бригадасы 2011 жылы туған жасөспірімге көмек көрсетті. Ол белгісіз жағдайларда жардан құлап кеткен.
Құтқарушылар оқиға орнына жедел жетіп, алғашқы медициналық көмек көрсетіп, зардап шеккен баланы жартасты аумақтан қауіпсіз түсіріп шығарды.
Кейін жасөспірім әрі қарай ем қабылдауы үшін жедел жәрдем қызметкерлеріне табысталды.
ТЖМ таулы және қиын жететін жерлерге барған кезде барынша сақ болуды, қауіпсіздік ережелерін қатаң сақтауды және табиғаттағы жүріс-тұрыс қағидаларын ескеруді сұрайды.
