Қазақстан Республикасы Атом энергиясы жөніндегі агенттігінде бірінші атом электр станциясының құрылысы аясындағы өндірісті оқшаулау мәселелеріне арналған кеңес өтті, деп хабарлайды DKNews.kz.
Талқылаудың негізгі өзегі – отандық кәсіпорындардың жобаға қатысуы, технологиялар трансферті, жергілікті өнеркәсіпті қолдау және жаңа жұмыс орындарын құру.
Фотосурет: ҚР Атом энергиясы агенттіктері
Аталған кеңесте АЭС құрылысы барысында шығындардың едәуір бөлігі қосалқы инфрақұрылымға, инженерлік жүйелерге, материалдар мен сервистердің кең ауқымына бағытталатыны атап өтілді. Бұл қазақстандық өндірушілер мен мердігерлерді кеңінен тартуға мүмкіндік береді.
Негізгі міндеттердің қатарында өнеркәсіптік кәсіпорындарды атом саласының талаптарына дайындау, технологиялар трансферін ұйымдастыру, жергілікті өндірістік қуаттарды дамыту және тұрақты жұмыспен қамтуды қамтамасыз ету.
Маңызды шешімдердің бірі атом энергетикасы саласы үшін тауарлар, жұмыстар мен қызметтер жеткізушілерінің арнайы тізілімін құру болмақ. Ол рәсімдердің ашықтығын, сапаны бақылауды және жобаға қатысуға тең қолжетімділікті қамтамасыз етеді. Арнайы тізілімді жүргізу үшін жеткізілімдердің ашықтығын, жеделдігін, сапасы мен қауіпсіздігін қамтамасыз ететін цифрлық платформа әзірлеу жоспарлануда.
Кеңес барысында АЭС құрылысы кезінде оқшаулауды дамытудың Кешенді жоспары жобасының негізгі элементтері таныстырылды. Онда ағымдағы жағдайға талдау, оқшаулаудың перспективалық бағыттары, өнеркәсіпті дамытуды ынталандыру тетіктері және мемлекеттік қолдау шаралары қамтылған.
Фотосурет: ҚР Атом энергиясы агенттіктері
«Біз тек білікті және сенімді қызмет көрсетушілерді тартуға мүмкіндік беретін жүйе қалыптастырып жатырмыз — бұл атом жобаларының қауіпсіздігі мен тиімділігінің негізі. Кешенді жоспарды іске асыру отандық өнеркәсіп кәсіпорындарының едәуір бөлігін жаңғыртуға, бірнеше жүздеген қазақстандық компанияны жеткізілім тізбегіне тартуға мықты база қалыптастыруға және жаңа өндірістердің ашылуына мүмкіндік береді. Бұл шағын және орта бизнестің дамуына, жаңа жұмыс орындарының құрылуына және өңірлік инфрақұрылымның жақсаруына серпін береді», — деді Агенттік төрағасы А. Сәтқалиев.
Кеңес қорытындысы бойынша өнеркәсіп пен құрылыс секторының жағдайына терең талдау жүргізу туралы шешім қабылданды. Мемлекеттік органдарға ұсынылған Кешенді жоспар жобасын қарастырып, өз ұсыныстарын енгізу тапсырылды. Бұған қоса жеткізушілер тізілімін құру және оның жұмысын қамтамасыз ететін цифрлық платформаны іске қосу жұмыстары жалғасатын болады.
